យោងតាមការផ្សាយរបស់សារព័ត៌មានបរទេស មនុស្សភាគច្រើនចូលចិត្តលាងបន្លែឱ្យស្អាតមុនដាក់ចូលទូទឹកកក ព្រោះគិតថាមានអនាម័យ ប៉ុន្តែការពិត “សំណើម” គឺជាសត្រូវធំដែលធ្វើឱ្យបន្លែឆាប់រលួយ និងដុះផ្សិត។ ដើម្បីរក្សាវីតាមីន និងភាពស្រស់បានយូរ អ្នកគួរអនុវត្តតាមបច្ចេកទេសខាងក្រោម៖
សម្រាប់បន្លែស្លឹកដូចជា សាលាដ និងជីរគ្រប់ប្រភេទ ការលាងមុននឹងធ្វើឱ្យស្លឹកជាំខ្មៅ និងរលួយលឿនបំផុត។ វិធីដែលល្អបំផុត គឺរក្សាវាឱ្យស្ងួត រួចរុំជាមួយកន្សែងក្រដាសដើម្បីបឺតសំណើម មុននឹងដាក់ក្នុងថង់បិទជិត។ ចំពោះបន្លែដែលមានផ្កាដូចជា ប្រូខូលី ឬផ្កាខាត់ណា ប្រសិនបើលាងទឹក នោះទឹកនឹងជ្រាបចូលក្នុងចន្លោះផ្កាតូចៗ បណ្ដាលឱ្យរលួយពីខាងក្នុងចេញមកក្រៅ ទោះបីសំបកក្រៅមើលទៅនៅល្អក៏ដោយ។
សូម្បីតែបន្លែមើមដូចជា ការ៉ុត ក៏មិនគួរលាងទឹកទុកមុនដែរ ព្រោះវាធ្វើឱ្យស្បែកមើមមានសំណើមខ្លាំង នាំឱ្យដុះផ្សិត និងទន់លឿន។ អ្នកគ្រាន់តែដុសជម្រះដីចេញឱ្យស្អាត និងរក្សាទុកក្នុងស្ថានភាពស្ងួតជាការស្រេច។
ជាទូទៅ ការរក្សាបន្លែឱ្យនៅស្ងួត និងលាងសម្អាតតែនៅពេលដែលអ្នកជិតយកមកចម្អិនប៉ុណ្ណោះ គឺជាវិធីសាស្ត្រដ៏វៃឆ្លាតបំផុតក្នុងការរក្សាគុណភាពអាហារ និងសន្សំសំចៃថវិកាគ្រួសារ៕