យោងតាមការផ្សាយរបស់សារព័ត៌មានបរទេស ការច្របាច់ទឹកក្រូចឆ្មារឱ្យបានច្រើន មិនមែនប្រើតែកម្លាំងបាយនោះទេ តែវាមានអាថ៌កំបាំងលើការរៀបចំ និងបច្ចេកទេសកាត់។ ដើម្បីទទួលបានទឹកក្រូចឆ្មារគ្រប់តំណក់ និងមិនបន្សល់រសជាតិល្វីង អ្នកអាចអនុវត្តតាមវិធីងាយៗដូចខាងក្រោម៖
មុននឹងកាត់ អ្នកគួរយកផ្លែក្រូចឆ្មារមករមៀលឬធ្លូញនៅលើតុឬជ្រញ់ដោយប្រើបាតដៃសង្កត់ថ្នមៗចុះឡើង។ វិធីនេះជួយឱ្យថង់ទឹកតូចៗនៅខាងក្នុងបែក ដែលធ្វើឱ្យទឹកហូរចេញមកបានយ៉ាងងាយ។ កាន់តែប្រសើរ ប្រសិនបើអ្នកដាក់ក្រូចឆ្មារចូលក្នុងមីក្រូវ៉េវរយៈពេល ១០ វិនាទី កម្ដៅនឹងជួយបន្ធូរសាច់ក្រូចឱ្យទន់ ធ្វើឱ្យអ្នកច្របាច់យកទឹកចេញបានស្ទើរតែ ១០០%។
ចំពោះបច្ចេកទេសប្រើឧបករណ៍ច្របាច់អាថ៌កំបាំងគឺត្រូវដាក់ “ផ្នែកសាច់បែរចុះក្រោម” និង “ផ្នែកសំបកនៅខាងលើ”។ នៅពេលអ្នកចុចឧបករណ៍ វានឹងរុញច្រានសាច់ក្រូចឱ្យត្រឡប់ទៅម្ខាងទៀត ដែលជួយជម្រះជាតិទឹកបានសព្វល្អ និងចៀសវាងជាតិល្វីងពីសំបក។
ការរក្សាទុកក្រូចឆ្មារនៅសីតុណ្ហភាពធម្មតា និងការរមៀលឱ្យទន់ គឺជាគន្លឹះវៃឆ្លាតដែលជួយសន្សំសំចៃថវិកាបានយ៉ាងច្រើន ជាពិសេសនៅពេលក្រូចឆ្មារឡើងថ្លៃ៕