យោងតាមការផ្សាយរបស់សារព័ត៌មានបរទេស ការផ្ដល់កាដូក្នុងថ្ងៃបុណ្យនៃក្ដីស្រឡាញ់ ឬដែលគេនិយមហៅថា«ថ្ងៃបុណ្យសង្សារ»មិនមែនស្ថិតលើតម្លៃទឹកប្រាក់នោះទេ ប៉ុន្តែវាស្ថិតលើ “ភាពច្នៃប្រឌិត” និង “ការយកចិត្តទុកដាក់”។ ថវិកាក្រោម ៣ ដុល្លារ ក៏អាចក្លាយជាកាដូដ៏មានតម្លៃ និងមើលទៅថ្លៃថ្នូរបានដែរ ប្រសិនបើអ្នកចេះរៀបចំវាឱ្យមានរបៀប និងមានរចនាបថប្លែកពីគេ។
គំនិតដំបូងគេគឺការរៀបចំ “កូនថូផ្កាស្ងួត” ឬផ្កាដេរដោយដៃ ដែលអាចរក្សាទុកបានយូរ និងមើលទៅមានសិល្បៈជាងផ្កាស្រស់ដែលងាយស្រួលក្រៀមស្វិត។ បន្ទាប់មក គឺការធ្វើ “សៀវភៅរូបភាពអនុស្សាវរីយ៍ខ្នាតតូច” ដោយគ្រាន់តែបោះពុម្ពរូបថតស្អាតៗពីរបីសន្លឹក រួចតុបតែងដោយពាក្យពេចន៍ចេញពីបេះដូង វានឹងក្លាយជាកាដូដែលមានន័យបំផុតសម្រាប់ដៃគូរបស់អ្នក។ ក្រៅពីនេះ ការរៀបចំកញ្ចប់ “តែ ឬកាហ្វេពិសេស” តុបតែងជាមួយបូយ៉ាងស្រស់ស្អាត ក៏ជាជម្រើសដ៏ល្អសម្រាប់អ្នកដែលចូលចិត្តភាពសាមញ្ញតែមានផាសុកភាព។
ម្យ៉ាងវិញទៀត ការផ្ដល់នូវ “ទៀនក្រអូបខ្នាតតូច” ឬ “សាប៊ូធ្វើដោយដៃ” ដែលមានក្លិនប្រហើរ ក៏អាចជួយបង្កើតបរិយាកាសកក់ក្ដៅ និងបង្ហាញពីការយកចិត្តទុកដាក់ចំពោះសុខុមាលភាពរបស់មនុស្សជាទីស្រឡាញ់។ អ្វីដែលសំខាន់បំផុតដើម្បីឱ្យកាដូតម្លៃ ៣ ដុល្លារ មើលទៅដូច ៣០ ដុល្លារ គឺការប្រើប្រាស់ក្រដាសខ្ចប់ពណ៌ស្រទន់ ការចងបូ និងការសរសេរសំបុត្រដោយដៃផ្ទាល់។ កាយវិការដ៏តូចតាចទាំងនេះហើយ ដែលធ្វើឱ្យកាដូរបស់អ្នកមាន “មន្តស្នេហ៍លំដាប់ហាយសូ” និងជាប់ក្នុងបេះដូងអ្នកទទួលជានិច្ច៕