យោងតាមការផ្សាយរបស់សារព័ត៌មានបរទេស មនុស្សជាច្រើនចូលចិត្តច្របាច់ក្រូចឆ្មារចូលក្នុងហ្វឺសាច់គោដើម្បីបង្កើនរសជាតិ ប៉ុន្តែតាមពិតទៅ វាក៏ផ្ដល់អត្ថប្រយោជន៍សុខភាពយ៉ាងមហាសាលដែលអ្នកនឹកស្មានមិនដល់។
ក្នុងសាច់គោមានផ្ទុកជាតិដែកខ្ពស់ ចំណែកក្រូចឆ្មារសម្បូរទៅដោយវីតាមីន C ដែលជា “ជំនួយការ” យ៉ាងសំខាន់ក្នុងការជួយឱ្យរាងកាយបឺតជញ្ជូនជាតិដែកបានកាន់តែប្រសើរ និងមានប្រសិទ្ធភាពបំផុត។ លើសពីនេះ ជាតិអាស៊ីតនៅក្នុងក្រូចឆ្មារ នៅពេលលាយឡំជាមួយអាស៊ីតអាមីណូក្នុងទឹកស៊ុប នឹងបង្កើតបាននូវរសជាតិផ្អែមឆ្ងាញ់ពិសាដែលធ្វើឱ្យអ្នកកាន់តែជក់មាត់។
ទោះបីជាកម្ដៅនៃទឹកស៊ុបអាចធ្វើឱ្យវីតាមីន C ខ្លះហួតបាត់បង់ក៏ដោយ ប៉ុន្តែក្នុងបរិមាណតិចតួចបំផុត ដែលវានៅតែផ្ដល់អត្ថប្រយោជន៍ខ្ពស់ដល់សុខភាព។ មិនត្រឹមតែហ្វឺសាច់គោទេ លោកអ្នកក៏អាចបន្ថែមក្រូចឆ្មារ ឬអាហារសម្បូរវីតាមីន C ផ្សេងទៀតដូចជា ម្ទេសប្លោក ការ៉ុត ឬប៉េងប៉ោះ ទៅក្នុងមុខម្ហូបដែលមានសាច់គោ ដើម្បីបង្កើនការបឺតជញ្ជូនជាតិដែក។ គន្លឹះសំខាន់មួយទៀតគឺ ជៀសវាងការញ៉ាំតែ ឬកាហ្វេភ្លាមៗ បន្ទាប់ពីញ៉ាំអាហារដែលមានជាតិដែកខ្ពស់ ព្រោះវាអាចរារាំងដំណើរការបឺតជញ្ជូនសារធាតុចិញ្ចឹមទាំងនោះទៅក្នុងរាងកាយ៕
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕