យោងតាមការផ្សាយរបស់សារព័ត៌មានបរទេស មនុស្សគ្រប់រូបសុទ្ធតែមានគោលដៅដ៏មហិច្ឆតា ប៉ុន្តែមូលហេតុចម្បងដែលធ្វើឱ្យមនុស្សភាគច្រើនបរាជ័យ គឺការបោះបង់ចោលនៅពាក់កណ្តាលទី។
ដើម្បីសម្រេចគោលដៅរយៈពេលវែងឱ្យមានប្រសិទ្ធភាព អ្នកត្រូវចាប់ផ្ដើមពីការទទួលស្គាល់តម្លៃនៃ “ជំហានតូចៗ” ដោយចាត់ទុកគោលដៅធំជាខ្សែបន្ទាត់ដែលតភ្ជាប់ពីជោគជ័យតូចៗប្រចាំថ្ងៃ ដែលជួយផ្ដល់កម្លាំងចិត្តឱ្យអ្នកបន្តដំណើរទៅមុខឥតឈប់ឈរ។ ការបែងចែកគោលដៅធំឱ្យទៅជាផ្នែកតូចៗដែលងាយស្រួលអនុវត្ត ក៏ជាគន្លឹះសំខាន់ផងដែរ ព្រោះវាជួយកាត់បន្ថយសម្ពាធផ្លូវចិត្ត និងភាពខ្ជិលច្រអូស ដូចជាការតាំងចិត្តអានសៀវភៅត្រឹមតែ ៣ ទំព័រក្នុងមួយថ្ងៃ ជាជាងការបង្ខំខ្លួនឯងឱ្យអានមួយក្បាលឱ្យចប់ក្នុងពេលតែមួយ។
ទន្ទឹមនឹងនេះ អ្នកមិនគួរលោភលន់កំណត់គោលដៅច្រើនពេកក្នុងពេលតែមួយឡើយ ប៉ុន្តែត្រូវផ្ដោតលើរឿងដែលសំខាន់បំផុតតែមួយ ហើយធ្វើវាឱ្យបានល្អបំផុត ដើម្បីចៀសវាងការបាត់បង់ការផ្ដោតអារម្មណ៍ និងការធ្វើការងារមិនមានប្រសិទ្ធភាព។ ចំណុចដែលមិនអាចខ្វះបានគឺការមាន “ផ្នត់គំនិតរីកចម្រើន” ដែលជាជំនឿថាខ្លួនឯងអាចអភិវឌ្ឍបានជានិច្ច ហើយមើលឃើញរាល់ឧបសគ្គដែលជួបប្រទះ មិនមែនជាការរារាំងឡើយ ប៉ុន្តែគឺជាឱកាសមាសសម្រាប់ការរៀនសូត្រ និងពង្រឹងសមត្ថភាពឱ្យកាន់តែរឹងមាំ។ ការអនុវត្តតាមគោលការណ៍ទាំងនេះ នឹងផ្លាស់ប្តូរពីការស្រមៃឱ្យក្លាយជាការពិតដ៏ជោគជ័យក្នុងរយៈពេលវែង៕
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕