យោងតាមការផ្សាយរបស់សារព័ត៌មានបរទេស រុក្ខជាតិអាចធ្វើឱ្យផ្ទះមើលទៅស្រស់ស្អាត ប៉ុន្តែការដាក់ខុសទីតាំងអាចក្លាយជាគ្រោះថ្នាក់ដែលអ្នកនឹកស្មានមិនដល់។
ការដាក់ផើងរុក្ខជាតិបិទបាំងមាត់ទ្វារ ឬផ្លូវដើរ មិនត្រឹមតែរារាំងលំហូរហុងស៊ុយប៉ុណ្ណោះទេ ប៉ុន្តែថែមទាំងបង្កហានិភ័យនៃការជំពប់ជើងដួលដល់មនុស្សចាស់ និងកុមារទៀតផង។ ចំពោះក្នុងបន្ទប់គេង ជាពិសេសនៅក្បាលគ្រែ អ្នកគួរជៀសវាងដាច់ខាត ព្រោះនៅពេលយប់រុក្ខជាតិនឹងដណ្ដើមខ្យល់អុកស៊ីសែនពីអ្នក ដែលធ្វើឱ្យដង្ហើមខ្លី គេងមិនលក់ និងអាចបង្កអាឡែស៊ីពីមេរោគក្នុងដី។
ចំណែកក្នុងផ្ទះបាយ កម្ដៅ និងចំហាយខ្លាញ់នឹងធ្វើឱ្យរុក្ខជាតិក្រៀមស្វិតយ៉ាងលឿន ហើយមែកឈើស្ងួតអាចងាយនឹងឆេះបង្កជាគ្រោះអគ្គិភ័យបានគ្រប់ពេល។ ចំពោះបន្ទប់ទឹកដែលបិទជិត និងគ្មានពន្លឺព្រះអាទិត្យ វានឹងធ្វើឱ្យរុក្ខជាតិរលួយឫស ដុះផ្សិត និងភាយក្លិនមិនល្អ ប៉ះពាល់ដល់អនាម័យទូទៅក្នុងផ្ទះ។
ជាចុងក្រោយ ការដាក់រុក្ខជាតិលើធ្នើរខ្ពស់ ឬព្យួរមិនរឹងមាំ គឺជាការប្រថុយប្រថានបំផុត ព្រោះវាអាចធ្លាក់មកលើមនុស្សបង្កជារបួសធ្ងន់ធ្ងរ និងធ្វើឱ្យអ្នកពិបាកក្នុងការស្រោចទឹកថែទាំ។ ដូច្នេះ មុននឹងសម្រេចចិត្តតុបតែងផ្ទះដោយរុក្ខជាតិ លោកអ្នកគួរគិតពីសុវត្ថិភាព និងខ្យល់ចេញចូលជាចម្បង ដើម្បីចៀសវាងការស្ដាយក្រោយនៅពេលក្រោយ៕