យោងតាមការផ្សាយរបស់សារព័ត៌មានបរទេស ទំពាំងគឺជាអាហារដែលសម្បូរទៅដោយជាតិសរសៃ ប្រូតេអ៊ីន និងសារធាតុរ៉ែ ប៉ុន្តែការញ៉ាំទំពាំងឆៅគឺជាទង្វើដ៏គ្រោះថ្នាក់បំផុត។
នៅក្នុងទំពាំងឆៅមានផ្ទុកសមាសធាតុដែលអាចបង្កើតជាសារធាតុពុល ស្យានីត ដែលនៅពេលវាចូលទៅក្នុងខ្លួន វានឹងបំប្លែងទៅជាអាស៊ីត បង្កឱ្យមានការពុលយ៉ាងធ្ងន់ធ្ងរ។ រោគសញ្ញានៃការពុលទំពាំងជាទូទៅលេចឡើងក្រោយពេលញ៉ាំបាន ៣០ នាទី រួមមានអាការៈចង់ក្អួត ឈឺក្បាល និងវិលមុខ ហើយក្នុងករណីធ្ងន់ធ្ងរ អាចបណ្ដាលឱ្យមានការប្រកាច់ ពិបាកដកដង្ហើម រហូតដល់បាត់បង់ជីវិត ជាពិសេសចំពោះកុមារ និងអ្នកដែលមានសុខភាពខ្សោយ។
ដើម្បីធានាសុវត្ថិភាពដល់សមាជិកគ្រួសារ លោកអ្នកត្រូវតែអនុវត្តតាមបច្ចេកទេសចម្អិនឱ្យបានត្រឹមត្រូវ ដោយចាប់ផ្ដើមពីការលាងសម្អាត និងត្រាំទំពាំងជាមួយទឹកអំបិល ឬទឹកអង្ករជាមុនសិន។ បន្ទាប់មក ត្រូវយកទំពាំងទៅស្ងោរក្នុងទឹកពុះឱ្យបានច្រើនដង ហើយត្រូវចាក់ទឹកស្ងោរនោះចោលជានិច្ច (ហាមយកទឹកស្ងោរទំពាំងមកស្ល)។ ចំណុចសំខាន់បំផុតគឺនៅពេលស្ងោរ “មិនត្រូវគ្របគម្របឆ្នាំងឡើយ” ដើម្បីឱ្យសារធាតុពុលអាចងាយនឹងភាយចេញតាមចំហាយទឹក។
ជារួម លោកអ្នកមិនត្រូវទទួលទានទំពាំងឆៅជាដាច់ខាត ទោះក្នុងរូបភាពណាក៏ដោយ។ ការជ្រើសរើសទំពាំងដែលមានប្រភពច្បាស់លាស់ មិនប្រើប្រាស់សារធាតុគីមីសម្រាប់ខាត់ឱ្យស រួមផ្សំជាមួយនឹងការស្ងោរឱ្យបានឆ្អិនល្អ គឺជាគន្លឹះដ៏សំខាន់ក្នុងការទាញយកអត្ថប្រយោជន៍ពីទំពាំងដោយមិនបារម្ភពីបញ្ហាសុខភាព។ ប្រសិនបើមានសញ្ញាមិនប្រក្រតីក្រោយពេលញ៉ាំ លោកអ្នកត្រូវប្រញាប់ទៅមន្ទីរពេទ្យជាបន្ទាន់ ដើម្បីសង្គ្រោះឱ្យបានទាន់ពេលវេលា៕