យោងតាមការផ្សាយរបស់សារព័ត៌មានបរទេស គ្រួសារជាច្រើនយល់ច្រឡំថា ការដាក់របស់របរនៅក្បែរម៉ាស៊ីនត្រជាក់ជួយរក្សាគុណភាពបានល្អ ប៉ុន្តែតាមពិតទៅ ការរួមផ្សំគ្នារវាង «ចរន្តខ្យល់ខ្លាំង សីតុណ្ហភាពទាប និងសំណើម» គឺជាសត្រូវស្ងៀមស្ងាត់ដែលបំផ្លាញទ្រព្យសម្បត្តិរបស់អ្នកឱ្យខូចមុនអាយុ។
ឧបករណ៍អេឡិចត្រូនិកដូចជា ទូរទស្សន៍ រ៉ោតទ័រ ឬព្រីភ្លើង ងាយនឹងរងផលប៉ះពាល់ពីសំណើមដែលកកកុញនៅខាងក្នុង បង្កជាច្រែះលើបន្ទះសៀគ្វី ឬអាចបណ្តាលឱ្យឆ្លងចរន្តអគ្គិសនី ខណៈដែលគ្រឿងសង្ហារិមឈើដែលប៉ះនឹងខ្យល់ត្រជាក់ស្ងួតពេក អាចនឹងរួញ ប្រេះស្រាំ ឬខូចទ្រង់ទ្រាយយ៉ាងងាយ។
សម្រាប់អ្នកដែលចូលចិត្តទុកសៀវភៅ ឯកសារសំខាន់ៗ ឬគ្រឿងសម្អាងនៅក្បែរម៉ាស៊ីនត្រជាក់ គួរមានការប្រុងប្រយ័ត្នខ្ពស់ ព្រោះសំណើម និងការប្រែប្រួលសីតុណ្ហភាពញឹកញាប់ នឹងធ្វើឱ្យក្រដាសផុយស្រួយ ដុះផ្សិត និងធ្វើឱ្យគ្រឿងសម្អាងបែកស្រទាប់បាត់បង់ប្រសិទ្ធភាពលឿនជាងកាលបរិច្ឆេទកំណត់។ បន្ថែមពីនេះ ទៀនក្រអូបអាចនឹងរឹងមិនស្មើគ្នា រីឯរុក្ខជាតិក្នុងផ្ទះអាចនឹងក្រៀមស្វិតដោយសារខ្យល់ត្រជាក់បក់ចំផ្ទាល់។ សូម្បីតែឧបករណ៍ប្រើថ្មក៏អាចរងការខូចខាត បង្កហានិភ័យនៃករណីហើមប៉ោងថ្ម ឬឆាប់អស់ថាមពលដោយសារសីតុណ្ហភាពទាបពេកផងដែរ។
ដើម្បីការពារទ្រព្យសម្បត្តិរបស់អ្នកឱ្យបានយូរអង្វែង និងសន្សំថវិកាក្នុងការជួសជុល អ្នកគួររៀបចំរបស់របរទាំងនេះឱ្យនៅឆ្ងាយពីរន្ធខ្យល់ម៉ាស៊ីនត្រជាក់យ៉ាងហោចណាស់ ១ ទៅ ២ ម៉ែត្រ។ ការជៀសវាងការបង្ហូរចរន្តខ្យល់ឱ្យបក់ចំរបស់របរផ្ទាល់ និងការទុកដាក់វត្ថុមានតម្លៃនៅក្នុងទូបិទជិតដែលមានសីតុណ្ហភាពថេរ គឺជាយុទ្ធសាស្ត្រដ៏ឆ្លាតវៃបំផុតក្នុងការថែរក្សារបស់របរឱ្យនៅថ្មី និងប្រើប្រាស់បានយូរ៕