យោងតាមការផ្សាយរបស់សារព័ត៌មានបរទេស បញ្ហាកែងជើងប្រេះមិនត្រឹមតែធ្វើឱ្យបាត់បង់សោភណភាព និងទំនុកចិត្តប៉ុណ្ណោះទេ ប៉ុន្តែបើទុកយូរអាចបង្កជាការឈឺចាប់ និងឆ្លងមេរោគ។
មូលហេតុចម្បងគឺបណ្ដាលមកពីស្បែកខ្វះជាតិទឹក ការដើរ ឬឈរយូរ និងកង្វះការថែទាំ។ ដើម្បីស្ដារសម្រស់ជើងឱ្យស្រស់ស្អាតឡើងវិញ អ្នកអាចអនុវត្តរូបមន្តពីផ្ទះបាយដោយប្រើត្រឹមតែ សូដាដុតនំ និង ក្រូចឆ្មារ តាមជំហានងាយៗខាងក្រោម៖
ដំបូង ចូររៀបចំទឹកក្ដៅឧណ្ហៗ រួចលាយសូដាដុតនំ ១-២ ស្លាបព្រាបាយ និងទឹកក្រូចឆ្មារចូល។ ត្រាំជើងរបស់អ្នកក្នុងទឹកនេះរយៈពេល ១៥ ទៅ ២០ នាទី។ សូដាដុតនំនឹងជួយធ្វើឱ្យកោសិកាស្បែកដែលងាប់ និងរឹងទន់រលោង ខណៈអាស៊ីតពីក្រូចឆ្មារជួយជម្រុះស្រទាប់ស្បែកចាស់ៗចេញ។ បន្ទាប់មក ប្រើថ្មខាត់ជើងដុសថ្នមៗដើម្បីជម្រុះស្បែកគ្រើមៗ រួចលាងសម្អាត និងជូតឱ្យស្ងួតល្អ។
អាថ៌កំបាំងសំខាន់បំផុតដែលមិនគួររំលងគឺ “នាទីមាស” ក្រោយខាត់ស្បែករួច។ អ្នកត្រូវលាបឡេវ៉ាសេលីន ឬក្រែមផ្ដល់សំណើមឱ្យជោកកែងជើង រួចពាក់ស្រោមជើងកប្បាសគេងពេញមួយយប់។ ការធ្វើបែបនេះនឹងជួយ “បិទជិត” សំណើម និងជំរុញឱ្យក្រែមជ្រាបចូលទៅក្នុងស្បែកបានជ្រៅបំផុត។
ការអនុវត្តវិធីនេះ ២ ទៅ ៣ ដងក្នុងមួយសប្តាហ៍ នឹងជួយឱ្យអ្នកទទួលបានកែងជើងទន់ត្រជាក់ រលោងស្អាត និងអាចពាក់ស្បែកជើងចំហរដោយក្តីមោទនភាពឡើងវិញ៕