យោងតាមការផ្សាយរបស់សារព័ត៌មានបរទេស ការបង្កើតអាជីវកម្មផ្ទាល់ខ្លួននៅឆ្នាំ ២០២៦ មិនមែនជាការលះបង់សន្តិសុខការងារនោះទេ ប៉ុន្តែជាការប្រើប្រាស់វិន័យ និងបច្ចេកវិទ្យាដើម្បីកសាងសន្តិសុខហិរញ្ញវត្ថុយូរអង្វែង។
ជំហានដំបូងដែលសំខាន់បំផុតគឺការអនុវត្តគោលការណ៍ ការកំណត់កាលវិភាគ ដោយបែងចែកម៉ោងធ្វើការបន្ថែមឱ្យដាច់ស្រឡះពីការងារប្រចាំ ដើម្បីធានាថាការងារទាំងពីរមិនជ្រៀតជ្រែកគ្នា។ ជាមួយគ្នានេះ បុរសឬនារីគួរតែវាយលុកទៅលើ ទីផ្សារពិសេស ដែលផ្ដោតលើជំនាញឯកទេសជាក់លាក់ ជាជាងការប្រកួតប្រជែងក្នុងទីផ្សារធំដែលសម្បូរគូប្រជែងខ្លាំង។
ដើម្បីឱ្យអាជីវកម្មអាចដំណើរការបានដោយមិនចាំបាច់នៅត្រួតពិនិត្យ ២៤ ម៉ោង ការជ្រើសរើសគំរូអាជីវកម្មដែល មិនដោះដូរពេលវេលាជាមួយទឹកប្រាក់ ដូចជាការលក់ផលិតផលឌីជីថល ឬការធ្វើទីផ្សារជាភ្នាក់ងារលក់បន្តយកកម្រៃជើងសារ គឺជាជម្រើសដ៏ឆ្លាតវៃបំផុត។ ទន្ទឹមនឹងនេះ ការប្រើប្រាស់ ប្រព័ន្ធស្វ័យប្រវត្តិកម្ម ដើម្បីគ្រប់គ្រងកិច្ចការដដែលៗ និងការកំណត់ កញ្ចប់ថវិកាវិនិយោគដាច់ដោយឡែក ពីលុយចាយវាយប្រចាំថ្ងៃ នឹងជួយកាត់បន្ថយហានិភ័យ និងសម្ពាធផ្លូវចិត្តបានយ៉ាងច្រើន។
មុននឹងសម្រេចចិត្តពង្រីកខ្លួនឱ្យកាន់តែធំ ការយកចិត្តទុកដាក់ស្ដាប់ មតិប្រតិកម្មពីអតិថិជនដំបូង នឹងក្លាយជាត្រីវិស័យជួយឱ្យផលិតផល ឬសេវាកម្មរបស់អ្នកកាន់តែមានគុណភាព។ ជាចុងក្រោយ អ្វីដែលមិនអាចខ្វះបានគឺការ កំណត់ថ្ងៃសម្រាក ឱ្យច្បាស់លាស់សម្រាប់ខ្លួនឯង ដើម្បីការពារការអស់កម្លាំងល្វើយ និងរក្សាថាមពលក្នុងការបន្តដំណើរទៅរកភាពជោគជ័យប្រកបដោយចីរភាព និងតុល្យភាពជីវិត៕