យោងតាមការផ្សាយរបស់សារព័ត៌មានបរទេស ទូទឹកកកគឺជាឧបករណ៍ដ៏សំខាន់សម្រាប់រក្សាអាហារ ប៉ុន្តែការប្រើប្រាស់ខុសបច្ចេកទេសអាចប្រែក្លាយវាទៅជាកន្លែងបង្កាត់ពូជបាក់តេរីដែលបង្កឱ្យមានជំងឺពុលអាហារ និងរលាកក្រពះពោះវៀនយ៉ាងធ្ងន់ធ្ងរ។
កំហុសឆ្គងដំបូងដែលមនុស្សភាគច្រើនតែងតែធ្វើ គឺការមិនលាងសម្អាត និងមិនជូតអាហារឱ្យស្ងួតមុនពេលដាក់ចូលទូទឹកកក ដែលសំណើមទាំងនោះគឺជាជម្រកដ៏ល្អសម្រាប់ពពួកបាក់តេរី និងផ្សិតលូតលាស់។ លើសពីនេះ ការដាក់ស៊ុត និងទឹកដោះគោនៅជាប់នឹងទ្វារទូទឹកកក ក៏ជារឿងមិនគួរធ្វើឡើយ ព្រោះការបើកបិទទ្វារញឹកញាប់ធ្វើឱ្យសីតុណ្ហភាពនៅត្រង់នោះមិនថេរ ដែលនាំឱ្យអាហារឆាប់ខូចគុណភាព។
កត្តាដែលគួរប្រុងប្រយ័ត្នខ្ពស់បំផុត គឺការរក្សាទុកអាហារឆ្អិនរយៈពេលយូរពេក ជាពិសេសបន្លែ និងផ្សិតមិនគួរទុកលើសពីមួយយប់ឡើយ ព្រោះវាអាចបង្កើតសារធាតុ ដែលអាចបង្កជាជំងឺមហារីកប្រសិនបើទទួលទានក្នុងកម្រិតខ្ពស់។ ជាមួយគ្នានេះ ការប្រើប្រាស់ថង់ប្លាស្ទិកធម្មតាដែលសម្បូរដោយសារធាតុពណ៌មកខ្ចប់អាហារ ក៏អាចផ្ដល់ហានិភ័យមហារីកផងដែរ។ លោកអ្នកគួរប្រើប្រាស់ប្រអប់កែវ ឬថង់ដែលផលិតឡើងសម្រាប់ដាក់អាហារផ្ទាល់ទើបជាការប្រសើរ។ ចំពោះអាហារដែលរលាយទឹកកករួចហើយ មិនត្រូវយកទៅក្លាសេឱ្យកកវិញជាលើកទីពីរឡើយ ព្រោះបាក់តេរីនឹងកើនឡើងទ្វេដង ដែលធ្វើឱ្យអាហារបាត់បង់រសជាតិ និងប៉ះពាល់ដល់សុខភាពយ៉ាងធ្ងន់ធ្ងរ។
ដើម្បីធានាសុវត្ថិភាពដល់សមាជិកគ្រួសារ ជាពិសេសកុមារ និងមនុស្សចាស់ដែលមានប្រព័ន្ធភាពស៊ាំខ្សោយ លោកអ្នកគួរលាងសម្អាតទូទឹកកកយ៉ាងហោចណាស់មួយខែម្ដង ដើម្បីកម្ចាត់ក្លិនមិនល្អ និងការកកកុញនៃបាក់តេរី។ អាហារដែលនៅសល់ពីការញ៉ាំ គួរត្រូវបានដាក់ចូលក្នុងទូទឹកកកនៅពេលវាស្ថិតក្នុងសីតុណ្ហភាពចន្លោះពី ៧០ ទៅ ៨០ អង្សាសេ និងត្រូវគ្របឱ្យជិតល្អដើម្បីកុំឱ្យមានការឆ្លងមេរោគពីអាហារឆៅ។
ប្រសិនបើលោកអ្នកមានរោគសញ្ញាដូចជា ឈឺក្បាល ចង្អោរ ឬរាករូសក្រោយពេលញ៉ាំអាហារដែលទុកក្នុងទូទឹកកក គួរប្រញាប់ទៅពិគ្រោះជាមួយគ្រូពេទ្យជាបន្ទាន់៕