យោងតាមការផ្សាយរបស់សារព័ត៌មានបរទេស ការជ្រើសរើសអាហារឱ្យបានត្រឹមត្រូវទៅតាមពេលវេលា គឺជាអាថ៌កំបាំងដែលជួយឱ្យអ្នកហាត់ប្រាណទទួលបានលទ្ធផលគាប់ប្រសើរ និងកាត់បន្ថយការឈឺចាប់សាច់ដុំយ៉ាងមានប្រសិទ្ធភាព។
មុនពេលចាប់ផ្ដើមហាត់ប្រាណ ការទទួលទានគ្រាប់ធញ្ញជាតិដូចជាអាល់ម៉ុនលាយជាមួយផ្លែប៊្លូបឺរី នឹងផ្តល់នូវសារធាតុ ដែលដើរតួដូចជា “អ្នកពន្លត់អគ្គិភ័យ” ជួយកាត់បន្ថយការរលាក និងការខូចខាតសាច់ដុំ។ ប្រសិនបើលោកអ្នកត្រូវការថាមពលជាប់បានយូរសម្រាប់ការហាត់ធ្ងន់ៗ ការញ៉ាំអាហារដែលមានកាបូអ៊ីដ្រាតដូចជា នំបុ័ងអង្ករសម្រូប ឬសណ្ដែកប្រភេទផ្សេងៗក្នុងរយៈពេល ២ ម៉ោងមុនហាត់ គឺជាជម្រើសដ៏ឆ្លាតវៃ។ ដោយឡែក ចេក និងទឹកឃ្មុំ ក៏ជាប្រភពថាមពលរហ័សដែលងាយរំលាយ និងជួយទប់ស្កាត់ការរមួលក្រពើបានយ៉ាងល្អផងដែរ។
បន្ទាប់ពីបញ្ចប់ការហាត់ប្រាណ ការស្ដារថាមពលឡើងវិញគឺជាកិច្ចការអាទិភាព ដែលក្នុងនោះដំឡូងជ្វាត្រូវបានចាត់ទុកជាអាហារដ៏ល្អបំផុតសម្រាប់បំពេញជាតិទឹក និងថាមពល ដែលបានបាត់បង់ទៅវិញ។ ជាមួយគ្នានេះដែរ ការទទួលទានអាហារសម្បូរប្រូតេអ៊ីនភ្លាមៗក្រោយពេលហាត់ នឹងជួយឱ្យរាងកាយជួសជុល និងកសាងសាច់ដុំបានយ៉ាងឆាប់រហ័ស ជាពិសេសសម្រាប់មនុស្សវ័យកណ្ដាល និងមនុស្សចាស់។ លោកអ្នកក៏អាចជ្រើសរើសការញ៉ាំភេសជ្ជៈ ដែលលាយបញ្ចូលគ្នារវាងបន្លែបៃតង និងប្រូតេអ៊ីន ដើម្បីជួយឱ្យរាងកាយស្រស់ថ្លាឡើងវិញ។
គន្លឹះសំខាន់គឺការតាមដានរាងកាយខ្លួនឯង និងការធ្វើឱ្យរបបអាហារមានតុល្យភាព ដើម្បីទទួលបានសុខភាពមាំមួន និងរូបរាងដែលប្រាថ្នាចង់បាន៕