យោងតាមការផ្សាយរបស់សារព័ត៌មានបរទេស ទឹកឃ្មុំគឺជាអាហារបំប៉នដ៏អស្ចារ្យ ប៉ុន្តែប្រសិទ្ធភាពរបស់វានឹងកើនឡើងទ្វេដង ប្រសិនបើលោកអ្នកទទួលទានចំពេលវេលាត្រឹមត្រូវ។
ការញ៉ាំទឹកឃ្មុំលាយទឹកក្ដៅឧណ្ហៗនៅ ពេលព្រឹក គឺជាជម្រើសដ៏ល្អបំផុតដើម្បីបង្កើនថាមពល បន្សាបជាតិពុលក្នុងខ្លួន សម្រួលដល់ការរំលាយអាហារ និងធ្វើឱ្យស្បែកមានសំណើមភ្លឺថ្លា។ សម្រាប់អ្នកដែលហាត់ប្រាណ ការញ៉ាំទឹកឃ្មុំមុន ឬក្រោយពេលហាត់ ក៏ជួយបំពេញជាតិស្ករធម្មជាតិ និងបង្កើនសមត្ថភាពរាងកាយបានយ៉ាងប្រសើរ ជំនួសឱ្យភេសជ្ជៈប៉ូវកម្លាំងដែលមានជាតិស្ករកែច្នៃខ្ពស់។
ក្រៅពីពេលព្រឹក ការទទួលទានទឹកឃ្មុំនៅ ពេលល្ងាច ឬមុនពេលចូលគេង ក៏ផ្ដល់អត្ថប្រយោជន៍មិនធម្មតាដែរ។ ការញ៉ាំទឹកឃ្មុំលាយជាមួយទឹកដោះគោក្ដៅមុនពេលសម្រាក នឹងជួយឱ្យលោកអ្នកគេងលក់ស្រួល ជួយដល់មុខងារថ្លើម និងកាត់បន្ថយអាការៈច្រាលអាស៊ីតក្រពះ។ ជាងនេះទៅទៀត ដោយសារវាមានសារធាតុប្រឆាំងបាក់តេរីខ្ពស់ ទឹកឃ្មុំគឺជាឱសថបុរាណដ៏ស័ក្តិសិទ្ធិសម្រាប់ព្យាបាលអាការៈក្អក ផ្ដាសាយ និងជួយឱ្យរាងកាយឆាប់ងើបកម្លាំងឡើងវិញក្រោយពេលឈឺ។
ទោះជាយ៉ាងណា លោកអ្នកមិនគួរទទួលទានទឹកឃ្មុំច្រើនហួសប្រមាណក្នុងមួយថ្ងៃឡើយ ទោះបីវាជាស្ករធម្មជាតិក៏ដោយ។ គន្លឹះសំខាន់គឺការញ៉ាំក្នុងបរិមាណសមល្មម និងទៀងទាត់ ដើម្បីទទួលបានសុខភាពមាំមួន និងប្រព័ន្ធការពាររាងកាយរឹងមាំ៕