យោងតាមការផ្សាយរបស់សារព័ត៌មានបរទេស ទោះបីជាអ្នកមានការងារមមាញឹកខ្លាំងរហូតគ្មានពេលចម្អិនអាហារ និងមានពេលវេលាគេងតិចត្រឹម ៣ ទៅ ៤ ម៉ោងក្នុងមួយយប់ ក៏អ្នកនៅតែអាចសម្រកទម្ងន់បានដែរ ប្រសិនបើអ្នកចេះរៀបចំយុទ្ធសាស្ត្រដែលសមស្របនឹងរបៀបរស់នៅជាក់ស្តែង។ គន្លឹះសំខាន់មិនមែនជាការដាក់គោលដៅខ្ពស់ពេកភ្លាមៗដែលនាំឱ្យមានសម្ពាធបន្ថែមនោះទេ ប៉ុន្តែគឺជាការធ្វើឱ្យប្រសើរឡើងនូវទម្លាប់តូចៗ “១% ជារៀងរាល់ថ្ងៃ” ដើម្បីចៀសវាងការធ្លាក់ចូលក្នុង “អន្ទាក់មេតាប៉ូលីស” ដែលធ្វើឱ្យទម្ងន់លែងស្រកក្រោយពេលអនុវត្តបានមួយរយៈដោយសាររាងកាយខ្វះអាហារូបត្ថម្ភ។
សម្រាប់ការរស់នៅបែបមមាញឹក ការរក្សានាឡិកាជីវសាស្ត្រនៃការញ៉ាំឱ្យបានទៀងពេលគឺជាចំណុចស្នូលដែលមិនអាចរំលងបាន។ ប្រសិនបើលោកអ្នកពិតជាគ្មានពេលរៀបចំម្ហូបអាហារដោយខ្លួនឯង លោកអ្នកអាចប្រើប្រាស់ជម្រើសរហ័សដែលមានសុខភាពល្អដូចជា ម្សៅប្រូតេអ៊ីនពីរុក្ខជាតិ ម្សៅបន្លែចម្រុះ ឬគ្រាប់ជី ដើម្បីធានាថារាងកាយទទួលបានជាតិសរសៃ និងមីក្រូសារធាតុគ្រប់គ្រាន់ ដែលជួយការពារការធ្លាក់ចុះជាតិស្ករក្នុងឈាម និងការឈឺក្រពះដោយសារការបង្អត់អាហារ។
នៅពេលត្រូវញ៉ាំអាហារនៅខាងក្រៅ ជម្រើសដ៏វៃឆ្លាតគឺការជ្រើសរើសហាងដែលមានមុខម្ហូបសម្បូរបន្លែស្រស់ និងប្រើគ្រឿងទេសតិចតួច ដូចជាហាងអាហារជប៉ុន ឬហាងសាឡាត់សាច់មាន់ ហើយត្រូវចៀសវាងហាងអាហារបំពង និងអាហាររហ័ស ដាច់ខាត។
មុនពេលចាប់ផ្ដើមអាហារចម្បង លោកអ្នកគួរ “រៀបចំក្រពះ” ជាមុនដោយការញ៉ាំទឹកមួយកែវ ឬញ៉ាំស៊ុបបន្លែ ដើម្បីកាត់បន្ថយការឃ្លានលើសកម្រិតដែលនាំឱ្យញ៉ាំច្រើនជ្រុល។ ក្នុងអំឡុងពេលញ៉ាំ អ្នកគួរអនុវត្តលំដាប់លំដោយដោយញ៉ាំជាតិសរសៃ និងប្រូតេអ៊ីនមុនជាតិម្សៅ រួមជាមួយការទំពារឱ្យបានម៉ដ្ឋល្អបំផុត។ ទោះបីជាគ្មានពេលចូលហាត់ប្រាណនៅក្លិប ក៏អ្នកអាចដុតរំលាយថាមពលបានតាមរយៈការដើរឱ្យបានពី ៥,០០០ ទៅ ៧,០០០ ជំហានក្នុងមួយថ្ងៃ ដែលជាមធ្យោបាយដ៏ងាយស្រួលក្នុងការកាត់បន្ថយហានិភ័យនៃជំងឺបេះដូង។
ការចំណាយពេលត្រឹម ៥ នាទីរាល់ល្ងាចដើម្បីសញ្ជឹងគិតពីស្ថានភាពរាងកាយ និងផ្លូវចិត្ត នឹងជួយឱ្យអ្នករកឃើញតុល្យភាព និងឈានទៅរកការសម្រកទម្ងន់ប្រកបដោយនិរន្តរភាព ទោះបីស្ថិតក្នុងកាលៈទេសៈដ៏មមាញឹកយ៉ាងណាក៏ដោយ៕