យោងតាមការផ្សាយរបស់សារព័ត៌មានបរទេស ការឈឺក្បាលអំឡុងពេល ឬក្រោយពេលរួមភេទ គឺជាស្ថានភាពរូបរាងកាយមួយដែលកើតឡើងញឹកញាប់ជាងអ្វីដែលយើងធ្លាប់ដឹង។ ទោះបីជាវាអាចបង្កឱ្យមានការភ័យខ្លាច ឬបំផ្លាញបរិយាកាសស្និទ្ធស្នាល ប៉ុន្តែភាគច្រើននៃករណីទាំងនេះមិនមែនជាសញ្ញាគ្រោះថ្នាក់ដល់ជីវិតនោះទេ។
យោងតាមការបកស្រាយរបស់អ្នកជំនាញ អាការៈនេះត្រូវបានបែងចែកជាពីរទម្រង់៖ ទីមួយគឺការឈឺចុកចាប់នៅតំបន់ក្បាល និងក ដែលកើតឡើងស្របពេលកម្រិតនៃការរំភើបកើនឡើង និងទីពីរគឺការឈឺចាប់ភ្លាមៗដូចជារន្ទះបាញ់ នៅខណៈពេលឈានដល់ចំណុចកំពូល។ មូលហេតុចម្បងនៃបញ្ហានេះគឺបណ្ដាលមកពី ការប្រែប្រួលភ្លាមៗនៃសម្ពាធឈាម និងភាពតានតឹងសាច់ដុំ។ នៅពេលរាងកាយមានភាពស្រើបស្រាលខ្លាំង សរសៃឈាមក្នុងខួរក្បាលនឹងរីកមាឌយ៉ាងរហ័ស ដែលបង្កឱ្យមានសម្ពាធ និងការឈឺចាប់។ កត្តារួមផ្សំផ្សេងទៀតរួមមាន ការខ្សោះជាតិទឹក ភាពតានតឹង កង្វះការសម្រាក ឬចំពោះអ្នកដែលមានប្រវត្តិឈឺក្បាលប្រកាំង។
ដើម្បីដោះស្រាយបញ្ហានេះ លោកអ្នកអាចសាកល្បងប្រើថ្នាំបំបាត់ការឈឺចាប់មុនពេលចាប់ផ្ដើម ឬកែសម្រួលក្បាច់ និងទីតាំងរួមភេទ ដើម្បីកាត់បន្ថយការប្រើកម្លាំងសាច់ដុំក និងស្មាខ្លាំងពេក។ ទោះជាយ៉ាងណាក៏ដោយ ប្រសិនបើអាការៈឈឺក្បាលនេះកើតឡើងខ្លាំងខុសពីធម្មតា ជាប់រហូតមិនបាត់ ឬមានរោគសញ្ញាផ្សេងទៀតដូចជាការក្អួតចង្អោរ ឬស្ពឹកស្រពន់ លោកអ្នកត្រូវប្រញាប់ទៅជួបគ្រូពេទ្យជាបន្ទាន់ ព្រោះវាអាចជាសញ្ញានៃបញ្ហាសរសៃឈាមខួរក្បាលដែលត្រូវការការពិនិត្យឱ្យបានហ្មត់ចត់៕