យោងតាមការផ្សាយរបស់សារព័ត៌មានបរទេសទុរេនត្រូវបានគេប្រសិទ្ធនាមថាជា “ស្ដេចផ្លែឈើ” ដោយសារតែរសជាតិដ៏ឈ្ងុយឆ្ងាញ់ និងសម្បូរទៅដោយសារធាតុចិញ្ចឹមខ្ពស់ដូចជា ប៉ូតាស្យូម ជាតិសរសៃ និងវីតាមីន ។ ទោះជាយ៉ាងណា ដោយសារតែវាមានផ្ទុកជាតិស្ករ និងកាឡូរីខ្ពស់ខ្លាំង មនុស្សជាច្រើនតែងមានការបារម្ភថា តើការញ៉ាំទុរេនពិតជាផ្ដល់ផលអាក្រក់ដល់ថ្លើម និងសុខភាពជារួមដែរឬទេ?
សម្រាប់មនុស្សដែលមានសុខភាពធម្មតា ការញ៉ាំទុរេនក្នុងបរិមាណសមល្មមអាចផ្ដល់ផលល្អដល់រាងកាយ ព្រោះវាមានសារធាតុប្រឆាំងអុកស៊ីតកម្មដែលជួយការពារកោសិកា។ ប៉ុន្តែសម្រាប់ថ្លើម ទុរេនអាចក្លាយជា “បន្ទុក” ប្រសិនបើអ្នកញ៉ាំច្រើនជ្រុល។ នៅពេលរាងកាយទទួលបានជាតិស្ករ និងកាឡូរីលើសលប់ក្នុងពេលតែមួយ ថ្លើមត្រូវធ្វើការធ្ងន់ដើម្បីបំប្លែងជាតិស្ករទាំងនោះទៅជាខ្លាញ់ ដែលអាចនាំឱ្យកើតមានបញ្ហា ថ្លើមមានជាតិខ្លាញ់។ លើសពីនេះ ទុរេនមានលក្ខណៈ “ក្ដៅ” ដែលតាមក្បួនវេជ្ជសាស្ត្របុរាណ វាអាចធ្វើឱ្យប៉ះពាល់ដល់តុល្យភាពក្នុងរាងកាយ និងបង្កជាអាការក្ដៅក្នុង បើញ៉ាំមិនមានការត្រួតពិនិត្យ។
ចំណុចដែលគ្រោះថ្នាក់បំផុតដែលអ្នកគួរចងចាំគឺ ការញ៉ាំទុរេនជាមួយគ្រឿងស្រវឹង។ ទុរេនមានផ្ទុកសារធាតុស្ពាន់ធ័រ ដែលអាចទៅរារាំងអង់ស៊ីមនៅក្នុងថ្លើមមិនឱ្យបំបែកជាតិពុលពីស្រាបានទាន់ពេលវេលា។ ការធ្វើបែបនេះអាចបណ្ដាលឱ្យមានអាការៈពុលស្រាធ្ងន់ធ្ងរ ចង្វាក់បេះដូងលោតខុសធម្មតា ឬករណីខ្លះអាចបណ្ដាលឱ្យបាត់បង់ជីវិត។
ដើម្បីញ៉ាំទុរេនដោយសុវត្ថិភាព លោកអ្នកគួរកំណត់ត្រឹម ២ ទៅ ៣ គ្រាប់ក្នុងមួយថ្ងៃ ផឹកទឹកឱ្យបានច្រើន និងចៀសវាងការញ៉ាំរួមគ្នាជាមួយភេសជ្ជៈដែលមានជាតិផ្អែមខ្លាំង ឬជាតិអាកុល៕