សន្សំលុយឱ្យក្លាយជាអ្នកមាន៖ ៦ វិធីកសាងទ្រព្យដោយមិនចាំបាច់ត្បិតត្បៀត

យោងតាមការផ្សាយរបស់សារព័ត៌មានបរទេស ការសន្សំលុយមិនមែនមានន័យថាត្រូវរស់នៅទាំងលំបាកវេទនា ឬមិនហ៊ានចាយវាយសូម្បីតែរបស់ដែលខ្លួនស្រលាញ់នោះទេ។ បុរសសម័យថ្មីដែលឆ្លាតវៃ គេផ្ដោតលើការ “គ្រប់គ្រងលំហូរវិជ្ជមាន” ជាជាងការ “កាត់បន្ថយតម្រូវការ”។ តាមរយៈការប្រើប្រាស់ប្រព័ន្ធគ្រប់គ្រងហិរញ្ញវត្ថុត្រឹមត្រូវ អ្នកអាចសន្សំប្រាក់បានរាប់ម៉ឺនដុល្លារក្នុងមួយឆ្នាំៗ ខណៈពេលដែលនៅតែអាចប្រើប្រាស់ជីវិតបានយ៉ាងស៊ីវិល័យ។

តិចនិកដំបូងដែលសំខាន់បំផុតគឺ ការប្រើប្រាស់ច្បាប់ 50/30/20។ នេះគឺជាវិធីបែងចែកប្រាក់ចំណូលដែលអ្នកត្រូវដាក់ ៥០% សម្រាប់តម្រូវការចាំបាច់ ៣០% សម្រាប់តម្រូវការផ្ទាល់ខ្លួន និង ២០% សម្រាប់តែការសន្សំ និងវិនិយោគ។ វិធីនេះជួយឱ្យអ្នកដឹងច្បាស់ថា អ្នកនៅតែមានលុយ ៣០% សម្រាប់ដើរលេង ឬទិញរបស់ដែលអ្នកចង់បាន ដោយមិនប៉ះពាល់ដល់គម្រោងអនាគត។ តិចនិកទីពីរគឺ ការដាក់ឱ្យវាដំណើរការដោយស្វ័យប្រវត្តិ។ លោកអ្នកគួរកំណត់ឱ្យធនាគារកាត់ប្រាក់សន្សំភ្លាមៗនៅថ្ងៃបើកប្រាក់ខែ ទៅកាន់គណនីសន្សំ ឬគណនីវិនិយោគ ដែលវិធីនេះជួយអ្នកឱ្យជៀសផុតពីអន្ទាក់ “ចាយសល់ចាំសន្សំ”។

ក្រៅពីនេះ ការយល់ដឹងពី កម្លាំងនៃអត្រាការប្រាក់សមាស គឺជាគន្លឹះមហាសាល។ ការចាប់ផ្ដើមសន្សំ និងវិនិយោគពីតិចតួចតែឱ្យបានទៀងទាត់ នឹងធ្វើឱ្យលុយរបស់អ្នកកើនឡើងជាលំដាប់តាមពេលវេលា។ បុរសសម័យថ្មីក៏ត្រូវចេះ បែងចែករវាងទ្រព្យសកម្ម និងទ្រព្យអសកម្ម ផងដែរ។ មុននឹងទិញរបស់ដែលមានតម្លៃថ្លៃ អ្នកគួរស្រមៃថា តើរបស់នោះនឹងជួយរកចំណូលឱ្យអ្នកវិញ ឬក៏វាគ្រាន់តែទាញលុយចេញពីហោប៉ៅរបស់អ្នកជារៀងរាល់ខែ?

ការជ្រើសរើសវិនិយោគលើចំណេះដឹង និងសុខភាព ក៏ជាការសន្សំដ៏ធំបំផុតមួយ ព្រោះវាការពារអ្នកពីការចំណាយមហាសាលលើការព្យាបាលជំងឺ ឬការខាតបង់ដោយសារការសម្រេចចិត្តខុសនាពេលអនាគត​៕