ប្រយ័ត្ន! ទម្លាប់ញ៉ាំច្រើនពេលយប់ កំពុងបំផ្លាញសុខភាព និងរាងកាយរបស់អ្នក

ការញ៉ាំច្រើននៅពេលល្ងាច ឬពេលយប់ជ្រៅ គឺជាមូលហេតុចម្បងមួយដែលធ្វើឱ្យរាងកាយងាយនឹងឡើងទម្ងន់ និងធាត់ជាងការញ៉ាំច្រើននៅពេលថ្ងៃ ។ ខាងក្រោមនេះ គឺជាហេតុផលវិទ្យាសាស្ត្រ និងទម្លាប់រស់នៅដែលពន្យល់ពីបញ្ហានេះ៖

១. សកម្មភាពរាងកាយមានកម្រិតទាប

នៅពេលថ្ងៃ រាងកាយរបស់យើងត្រូវការថាមពលច្រើនដើម្បីធ្វើការ ដើរ ឬរើបម្រាស់។ ប៉ុន្តែនៅពេលល្ងាច សកម្មភាពទាំងនោះត្រូវបានកាត់បន្ថយមកនៅត្រឹមការអង្គុយសម្រាក ឬដេក។ នៅពេលអ្នកញ៉ាំច្រើន ថាមពល (Calories) ដែលទទួលបានពីអាហារមិនត្រូវបានដុតរំលាយអស់ឡើយ ដែលនាំឱ្យរាងកាយយកថាមពលដែលលើសទាំងនោះទៅរក្សាទុកជា “ខ្លាញ់” វិញ។

២. អត្រាមេតាបូលីសចុះខ្សោយ

យោងតាមនាឡិកាជីវសាស្ត្ររបស់រាងកាយ ប្រព័ន្ធដុតរំលាយអាហាររបស់យើងមានដំណើរការខ្លាំងនៅពេលថ្ងៃ និងចាប់ផ្ដើមយឺតយ៉ាវនៅពេលយប់ ។ ការញ៉ាំអាហារធ្ងន់ៗ ឬអាហារដែលមានជាតិស្ករ និងខ្លាញ់ខ្ពស់នៅពេលយប់ ធ្វើឱ្យរាងកាយពិបាកក្នុងការបំប្លែងវាទៅជាថាមពល។

៣. ការប្រែប្រួលនៃអរម៉ូន

-Insulin: នៅពេលយប់ រាងកាយរបស់យើងអាចនឹងមានភាពស៊ាំនឹងអាំងស៊ុយលីន (Insulin Resistance) ខ្ពស់ជាងពេលថ្ងៃ។ មានន័យថា បើអ្នកញ៉ាំជាតិស្ករច្រើននៅពេលយប់ កម្រិតជាតិស្ករក្នុងឈាមនឹងឡើងខ្ពស់ ហើយរាងកាយនឹងផ្ទុកជាតិស្ករទាំងនោះជាខ្លាញ់បានលឿនជាងមុន។

-Cortisol: ការញ៉ាំច្រើនដោយសារស្ត្រេសនៅពេលយប់ ធ្វើឱ្យអរម៉ូនស្ត្រេសកើនឡើង ដែលវារុញច្រានឱ្យរាងកាយសន្សំខ្លាញ់ ជាពិសេសនៅតំបន់ពោះ។

៤. ប្រភេទអាហារដែលជ្រើសរើស

ភាគច្រើន ការញ៉ាំច្រើននៅពេលល្ងាចមិនមែនជាការញ៉ាំបន្លែ ឬផ្លែឈើនោះទេ ប៉ុន្តែជាអាហារសម្រន់ (Snacks) អាហារដែលមានជាតិប្រៃ ជាតិផ្អែម ឬអាហារ Fast Food។ អាហារទាំងនេះមានកាឡូរីខ្ពស់ណាស់ ប៉ុន្តែមិនសូវផ្ដល់ជីវជាតិ ដែលងាយធ្វើឱ្យឡើងគីឡូបំផុត។

៥. ការរំខានដល់ដំណេក

ការញ៉ាំឆ្អែតពេកធ្វើឱ្យប្រព័ន្ធរំលាយអាហារធ្វើការខ្លាំង ដែលនាំឱ្យអ្នកគេងមិនសូវលក់ ឬគេងមិនស្កប់។ នៅពេលអ្នកគេងមិនគ្រប់គ្រាន់ រាងកាយនឹងផលិតអរម៉ូនម្យ៉ាងឈ្មោះថា Ghrelin (អរម៉ូនឃ្លាន) កាន់តែច្រើននៅថ្ងៃបន្ទាប់ ដែលធ្វើឱ្យអ្នកចង់ញ៉ាំកាន់តែច្រើនជាងមុន។