យោងតាមការផ្សាយរបស់សារព័ត៌មានបរទេស ទឹកដោះគោគឺជាប្រភពនៃប្រូតេអ៊ីន និងកាល់ស្យូមដ៏វិសេស ប៉ុន្តែប្រសិនបើអ្នកញ៉ាំវាលាយឡំជាមួយអាហារមួយចំនួន វានឹងបង្កជាបញ្ហាដល់ប្រព័ន្ធរំលាយអាហារ ឬធ្វើឱ្យរាងកាយមិនអាចបឺតស្រូបជីវជាតិបានល្អ។
យោងតាមអ្នកជំនាញសុខភាព នេះគឺជាអាហារ ៥ ប្រភេទដែលអ្នកគួរចៀសវាងការញ៉ាំរួមជាមួយទឹកដោះគោ៖
អាហារដំបូងដែលមនុស្សភាគច្រើនយល់ច្រឡំថាជាការរួមផ្សំដ៏ល្អគឺ ផ្លែចេក។ តាមពិតទៅ ការញ៉ាំចេកជាមួយទឹកដោះគោធ្វើឱ្យប្រព័ន្ធរំលាយអាហារធ្វើការធ្ងន់ និងចំណាយពេលយូរក្នុងការបំប្លែង ដែលនាំឱ្យអ្នកមានអារម្មណ៍ងងុយដេក និងអស់កម្លាំង។ ចំពោះការញ៉ាំ ត្រី រួមជាមួយទឹកដោះគោ ក៏អាចបង្កឱ្យមានបញ្ហារំលាយអាហារធ្ងន់ធ្ងរ ដូចជាការឈឺពោះខ្លាំង ឬអាចបង្កជាបញ្ហាអាឡែស៊ីលើស្បែកផងដែរ។ លើសពីនេះ ផ្លែឈើដែលមានជាតិអាស៊ីត (ដូចជា ក្រូច ឬក្រូចឆ្មារ) នឹងធ្វើឱ្យទឹកដោះគោក្នុងក្រពះកកដុំៗ ដែលបណ្ដាលឱ្យអ្នកមានអាការៈចង់ក្អួត ឬក្អួតចង្អោរតែម្ដង។
ក្រៅពីនេះ ការញ៉ាំ ផ្លែឪឡឹក ជាមួយទឹកដោះគោ ក៏មិនមែនជាជម្រើសល្អដែរ ព្រោះឪឡឹកសម្បូរទៅដោយជាតិទឹក ចំណែកទឹកដោះគោមានជាតិរំអិល ដែលនៅពេលញ៉ាំចូលគ្នា វានឹងធ្វើឱ្យអ្នកឆ្អល់ពោះ និងហើមពោះភ្លាមៗ។
ចុងក្រោយគឺ អាហារសម្រន់ដែលមានជាតិប្រៃ (ដូចជា ដំឡូងបារាំងបំពង ឬនំស្រួយ) ព្រោះជាតិអំបិលខ្ពស់អាចទៅរំខានដល់តុល្យភាពអេឡិចត្រូលីត ក្នុងរាងកាយនៅពេលញ៉ាំលាយជាមួយទឹកដោះគោ ដែលបណ្ដាលឱ្យមានអារម្មណ៍មិនស្រួលក្នុងពោះ។ ដើម្បីសុវត្ថិភាព លោកអ្នកគួរទុកចន្លោះពេលយ៉ាងតិច ២ ម៉ោង បន្ទាប់ពីញ៉ាំអាហារទាំងនេះមុននឹងផឹកទឹកដោះគោ៕