យោងតាមការផ្សាយរបស់សារព័ត៌មានបរទេស ចំពោះការប្រើប្រាស់ដបទឹករក្សាកម្ដៅ ឬដបដែកអ៊ីណុក វាពិតជាមានភាពងាយស្រួលក្នុងការរក្សាសីតុណ្ហភាពភេសជ្ជៈឱ្យនៅក្ដៅ ឬត្រជាក់បានយូរ ប៉ុន្តែលោកអ្នកត្រូវមានការប្រុងប្រយ័ត្នខ្ពស់ចំពោះប្រភេទភេសជ្ជៈមួយចំនួនដែលអាចបង្កប្រតិកម្មគីមីមិនល្អ។
ភេសជ្ជៈដំបូងដែលមិនគួរដាក់ក្នុងដបប្រភេទនេះគឺ ទឹកផ្លែឈើដែលមានជាតិអាស៊ីតខ្ពស់ ដូចជាទឹកក្រូច ទឹកក្រូចឆ្មារ ឬទឹកម្នាស់ ព្រោះជាតិអាស៊ីតអាចទៅរេចរឹលស្រទាប់ការពារខាងក្នុងនៃលោហៈ បណ្ដាលឱ្យជាតិដែក ឬលោហៈធ្ងន់រលាយចូលក្នុងទឹក ដែលអាចប៉ះពាល់ដល់សុខភាពតម្រងនោម និងប្រព័ន្ធសរសៃប្រសាទក្នុងរយៈពេលវែង។
ភេសជ្ជៈបន្ទាប់គឺ ទឹកដោះគោ ឬផលិតផលធ្វើពីទឹកដោះគោគ្រប់ប្រភេទ ដោយសារបរិយាកាសបិទជិត និងកម្ដៅនៅក្នុងដបគឺជាជម្រកដ៏ល្អបំផុតសម្រាប់បាក់តេរីរីកលូតលាស់យ៉ាងលឿន ដែលធ្វើឱ្យទឹកដោះគោឆាប់ផ្អូម និងអាចបង្កឱ្យមានការពុលអាហារ ឬរាករូសធ្ងន់ធ្ងរ។ ស្រដៀងគ្នានេះដែរ ភេសជ្ជៈដែលមានហ្គាស ក៏មិនគួរដាក់ក្នុងដបប្រភេទនេះដែរ ព្រោះសម្ពាធខ្យល់ចេញពីហ្គាសអាចធ្វើឱ្យគម្របដបផ្ទុះរបើក ឬធ្វើឱ្យដបខូចទ្រង់ទ្រាយបង្កគ្រោះថ្នាក់ដល់អ្នកប្រើប្រាស់។
ក្រៅពីនេះ ការត្រាំស្លឹកតែក្នុងដបបិទជិតដែលមានកម្ដៅយូរពេក នឹងធ្វើឱ្យតែបញ្ចេញជាតិពុលម្យ៉ាងហៅថា តានីន ច្រើនហួសកម្រិត ដែលវាមិនត្រឹមតែធ្វើឱ្យប៉ះពាល់ដល់ការបឺតស្រូបជាតិដែកក្នុងរាងកាយប៉ុណ្ណោះទេ ប៉ុន្តែថែមទាំងធ្វើឱ្យដបមានស្នាមប្រឡាក់ជាប់ជានិច្ចដែលពិបាកនឹងសម្អាត។ ចុងក្រោយគឺ ឱសថបុរាណ ឬថ្នាំចិន ដែលសារធាតុផ្សំក្នុងថ្នាំទាំងនោះអាចមានប្រតិកម្មជាមួយជាតិលោហៈ ធ្វើឱ្យបាត់បង់ប្រសិទ្ធភាពព្យាបាល និងអាចបង្កើតជាសារធាតុពុលថ្មីប៉ះពាល់ដល់រាងកាយវិញ។
ដើម្បីសុវត្ថិភាព លោកអ្នកគួរប្រើប្រាស់ដបទឹករក្សាកម្ដៅសម្រាប់តែទឹកស្អាតធម្មតា ឬកាហ្វេដែលមិនមានជាតិអាស៊ីតខ្លាំង ហើយគួរលាងសម្អាតឱ្យបានស្អាតជានិច្ចក្រោយពេលប្រើប្រាស់រួច ដើម្បីការពារការកកកុញនៃមេរោគដែលមើលមិនឃើញ៕