យោងតាមការផ្សាយរបស់សារព័ត៌មានបរទេស ការញ៉ាំសាច់គឺជាប្រភពដ៏សំខាន់នៃប្រូតេអ៊ីន និងវីតាមីន ដែលជួយដល់ការលូតលាស់សាច់ដុំ និងប្រព័ន្ធសរសៃប្រសាទ។ ប៉ុន្តែអ្វីដែលជាបញ្ហានោះគឺ “បរិមាណ” និង “ប្រភេទសាច់” ដែលយើងជ្រើសរើស។ ការញ៉ាំសាច់ច្រើនហួសកំណត់ ជាពិសេសសាច់ក្រហម និងសាច់កែច្នៃ ត្រូវបានរកឃើញថាផ្សារភ្ជាប់យ៉ាងខ្លាំងទៅនឹងជំងឺបេះដូង លើសឈាម និងមហារីកពោះវៀនធំ។
ដើម្បីទទួលបានសុខភាពល្អ អ្នកជំនាញអាហាររូបត្ថម្ភបានណែនាំនូវ “ច្បាប់ដៃ” ងាយៗ៖ បរិមាណសាច់ដែលអ្នកគួរញ៉ាំក្នុងមួយពេល មិនគួរធំជាងបាតដៃរបស់អ្នកឡើយ (ប្រហែល ៨០ ទៅ ១០០ ក្រាម)។ ក្នុងមួយចានបាយ លោកអ្នកគួររៀបចំឱ្យមានតុល្យភាព ដោយទុកកន្លែងសម្រាប់បន្លែចំនួនពាក់កណ្តាលចាន បាយឬធញ្ញជាតិមួយភាគបួន និងសាច់ត្រឹមតែមួយភាគបួនប៉ុណ្ណោះ។ ការធ្វើបែបនេះមិនត្រឹមតែជួយឱ្យរាងកាយទទួលបានប្រូតេអ៊ីនគ្រប់គ្រាន់ប៉ុណ្ណោះទេ ប៉ុន្តែថែមទាំងផ្តល់នូវជាតិសរសៃពីបន្លែ ដើម្បីជួយសម្រួលដល់ការរំលាយសាច់ និងកាត់បន្ថយការស្រូបយកជាតិខ្លាញ់អាក្រក់ចូលក្នុងសរសៃឈាម។
ក្រៅពីបរិមាណ ការជ្រើសរើសប្រភេទសាច់ក៏ជារឿងចាំបាច់។ លោកអ្នកគួរផ្តល់អាទិភាពដល់សាច់ស ដូចជាសាច់មាន់ (ទ្រូងមាន់) និងត្រី ឱ្យបានច្រើនជាងសាច់ក្រហម (សាច់គោ សាច់ជ្រូក)។ ចំពោះសាច់ក្រហម លោកអ្នកមិនគួរញ៉ាំលើសពី ៥០០ ក្រាមក្នុងមួយសប្តាហ៍ឡើយ ហើយគួរចៀសវាងដាច់ខាតនូវសាច់កែច្នៃដូចជា ហតដុក សាច់ប៉ាតេ ឬសាច់បន្ទះដែលសម្បូរទៅដោយជាតិអំបិល និងសារធាតុរក្សាទុកយូរ។
ការរៀបចំតុល្យភាពសាច់លើចានបាយបែបនេះ គឺជាវិធីសាស្ត្រដ៏សាមញ្ញបំផុតក្នុងការការពាររាងកាយពីជំងឺរ៉ាំរ៉ៃ និងរក្សាទម្ងន់ឱ្យនៅថេរបានយូរអង្វែង៕