យោងតាមការផ្សាយរបស់សារព័ត៌មានបរទេស មានការយល់ឃើញខុសៗគ្នាជាច្រើនអំពីពេលវេលាដ៏សមស្របសម្រាប់ការដើរក្រោយពេលញ៉ាំបាយ ប៉ុន្តែជាទូទៅការធ្វើសកម្មភាពរាងកាយស្រាលៗភ្លាមៗក្រោយការញ៉ាំ គឺផ្ដល់អត្ថប្រយោជន៍ច្រើនជាងផលអាក្រក់។
តាមការណែនាំរបស់អ្នកជំនាញ លោកអ្នកគួរចាប់ផ្ដើមដើរនៅប្រហែល ៣០ នាទីក្រោយពេលញ៉ាំ ឬនៅពេលណាដែលអារម្មណ៍ថាធូរស្រាលក្នុងខ្លួន ដោយមិនចាំបាច់បង្ខំល្បឿនលឿនពេកនោះទេ។ សូម្បីតែការដើរយឺតៗត្រឹមតែពីរបីនាទី ក៏អាចជួយឱ្យសាច់ដុំចាប់ផ្ដើមដុតរំលាយជាតិស្ករក្នុងឈាមបានយ៉ាងមានប្រសិទ្ធភាពជាងការអង្គុយ ឬដេកនៅស្ងៀម ដែលនេះគឺជាគន្លឹះដ៏សំខាន់ក្នុងការកាត់បន្ថយហានិភ័យនៃជំងឺបេះដូង និងសរសៃឈាម។
លើសពីការគ្រប់គ្រងជាតិស្ករ ការដើរក្រោយពេលញ៉ាំបាយក៏ដើរតួនាទីយ៉ាងសំខាន់ក្នុងការជួយសម្រកទម្ងន់ តាមរយៈការបង្កើនការដុតរំលាយកាឡូរី និងថាមពលដែលលើស។ ចំពោះអ្នកដែលមានបញ្ហាសម្ពាធឈាម ឬលើសជាតិខ្លាញ់ ការដើរឱ្យបាន ២០ នាទី យ៉ាងហោចណាស់ ៣ ដងក្នុងមួយសប្តាហ៍ នឹងជួយបញ្ចុះសម្ពាធឈាម និងការពារសរសៃឈាមពីការកកស្ទះជាតិខ្លាញ់។ ក្រៅពីអត្ថប្រយោជន៍ចំពោះរាងកាយ វាក៏ជួយសម្រួលដល់ប្រព័ន្ធរំលាយអាហារឱ្យដំណើរការបានរលូន ជួយឱ្យអ្នកគេងលក់បានស្កប់ស្កល់ជាងមុន និងកាត់បន្ថយភាពតានតឹងបន្ទាប់ពីការងារពេញមួយថ្ងៃ។
សម្រាប់អ្នកដែលមិនធ្លាប់ហាត់ប្រាណពីមុនមក ការចាប់ផ្ដើមដោយការដើរត្រឹមតែ ១០ នាទីជារៀងរាល់ថ្ងៃ គឺជាជំហានដ៏ឈ្លាសវៃបំផុត។ នៅពេលដែលរាងកាយចាប់ផ្ដើមស៊ាំនឹងសកម្មភាពនេះ លោកអ្នកអាចបង្កើនរយៈពេលនៃការដើរបន្តិចម្ដងៗឱ្យក្លាយជាទម្លាប់សុខភាពដែលមិនអាចខ្វះបាន។
ការធ្វើបែបនេះមិនត្រឹមតែជួយការពារជំងឺរ៉ាំរ៉ៃប៉ុណ្ណោះទេ ប៉ុន្តែថែមទាំងជួយឱ្យសុខភាពផ្លូវចិត្តកាន់តែប្រសើរឡើង និងជួយឱ្យនាឡិកាជីវសាស្ត្រក្នុងខ្លួនមានតុល្យភាពល្អមាំមួនជានិច្ច៕