យោងតាមការផ្សាយរបស់សារព័ត៌មានបរទេស ការគេងថ្ងៃក្នុងរយៈពេលខ្លី គឺជា “ថ្នាំទិព្វ” សម្រាប់មនុស្សវ័យលើសពី ៥០ ឆ្នាំ ក្នុងការជួយឱ្យខួរក្បាលស្វាហាប់ និងពង្រឹងការចងចាំ។ ប៉ុន្តែ បើគេងខុសរបៀប វាអាចប្រែក្លាយជាគ្រោះថ្នាក់ដល់អាយុជីវិតទៅវិញ។ យោងតាមការសិក្សាលើមនុស្សជាង ៣ សែននាក់ បានបង្ហាញថា ការគេងថ្ងៃលើសពី ១ ម៉ោង បង្កើនហានិភ័យនៃជំងឺបេះដូង និងអត្រាមរណភាពខ្ពស់។ រយៈពេលដែលល្អបំផុតគឺត្រឹមតែ ២០ ទៅ ៣០ នាទី ប៉ុណ្ណោះ។
ក្រៅពីរយៈពេលគេង អ្នកជំនាញបានព្រមានឱ្យមនុស្សវ័យកណ្តាលបញ្ឈប់ជាបន្ទាន់នូវទម្លាប់គ្រោះថ្នាក់ចំនួន ២ គឺ៖
១. គេងភ្លាមក្រោយញ៉ាំឆ្អែត៖ នៅពេលញ៉ាំរួចហើយគេងភ្លាម ឈាមនឹងប្រមូលផ្តុំទៅជួយក្រពះឱ្យរំលាយអាហារ ដែលធ្វើឱ្យខួរក្បាលខ្វះអុកស៊ីសែនបណ្តោះអាសន្ន។ យកល្អ គួររង់ចាំយ៉ាងតិច ២០ ទៅ ៣០ នាទីក្រោយញ៉ាំអាហាររួច សឹមសម្រាក។
២. គេងផ្កាប់មុខលើតុ៖ ការគេងក្នុងឥរិយាបថនេះ បង្កសម្ពាធខ្លាំងលើទ្រូង ភ្នែក និងឆ្អឹងខ្នង។ វារាំងស្ទះដល់លំហូរឈាមទៅកាន់ខួរក្បាល និងប៉ះពាល់ដល់ប្រព័ន្ធសរសៃប្រសាទក្នុងរយៈពេលវែង។
ដើម្បីទាញយកប្រយោជន៍ពីការគេងថ្ងៃឱ្យបានពេញលេញ លោកអ្នកគួរជ្រើសរើសការគេងផ្ងារ ឬផ្អៀងខ្លួនក្នុងកន្លែងស្ងប់ស្ងាត់ និងកុំភ្លេចកំណត់ម៉ោងរោទិ៍កុំឱ្យលើសពីកន្លះម៉ោង។ ការផ្លាស់ប្តូរទម្លាប់តូចតាចនេះ នឹងជួយការពារអ្នកពីជំងឺសរសៃឈាមខួរក្បាល និងធ្វើឱ្យរាងកាយមានថាមពលរស់រវើកពេញមួយថ្ងៃ៕