យោងតាមការផ្សាយរបស់សារព័ត៌មានបរទេស ការសម្រកទម្ងន់មិនមែនទាមទារតែការហាត់ប្រាណខ្លាំងក្លានៅកន្លែងហាត់ប្រាណនោះទេ ប៉ុន្តែអាថ៌កំបាំងនៃរាងកាយស្លីមស្អាតអាចលាក់ទុកនៅក្នុងទម្លាប់នៃការគេងរបស់អ្នក។ នៅពេលអ្នកគេងលក់ប្រកបដោយគុណភាព រាងកាយនឹងបញ្ចេញអ័រម៉ូនសំខាន់ៗដើម្បីជួសជុលកោសិកា និងដុតបំផ្លាញជាតិខ្លាញ់លើស។
ប្រសិនបើលោកអ្នកចេះកែសម្រួលទម្លាប់នៃការគេងឱ្យបានត្រឹមត្រូវ រាងកាយរបស់អ្នកនឹងប្រែក្លាយទៅជាឡដុតថាមពលដ៏មានប្រសិទ្ធភាពបំផុត ទោះបីជាអ្នកកំពុងស្ថិតក្នុងដំណេកក៏ដោយ។
ជំហានដំបូងដែលសំខាន់បំផុតគឺការចូលគេងឱ្យត្រូវតាមនាឡិការាងកាយ ដោយគួរចូលគេងឱ្យបានមុនម៉ោង ១១ យប់ ដើម្បីអនុញ្ញាតឱ្យរាងកាយបញ្ចេញអរម៉ូនលូតលាស់ បានពេញលេញ ដែលអ័រម៉ូននេះមានតួនាទីយ៉ាងសំខាន់ក្នុងការបំបែកជាតិខ្លាញ់ និងរក្សាភាពក្មេងជាងវ័យ។ បន្ថែមពីនេះ ការលៃតម្រូវសីតុណ្ហភាពបន្ទប់គេងឱ្យនៅចន្លោះ ១៩ ទៅ ២២ អង្សាសេ នឹងជួយជំរុញការផលិត “ខ្លាញ់ពណ៌ត្នោត” ដែលជាខ្លាញ់ល្អមានតួនាទីដុតបំផ្លាញកាឡូរីដើម្បីរក្សាកម្ដៅរាងកាយ។ បរិយាកាសងងឹតស្លុបក៏ជារឿងមិនអាចខ្វះបានដែរ ព្រោះវាជួយឱ្យរាងកាយផលិតមេឡាតូនីនបានអតិបរមា ដែលជាអ័រម៉ូនជំរុញការរំលាយអាហារក្នុងពេលគេងជ្រៅ។
ក្រៅពីបរិយាកាសក្នុងបន្ទប់ ទម្លាប់មុនពេលចូលគេងក៏ជះឥទ្ធិពលយ៉ាងធំធេងដល់ការសម្រកទម្ងន់ផងដែរ។ លោកអ្នកគួរចៀសវាងការញ៉ាំអាហារយ៉ាងហោចណាស់ ៣ ម៉ោងមុនពេលសម្រាក ដើម្បីរក្សាកម្រិតអាំងស៊ុយលីនឱ្យទាប ដែលជាលក្ខខណ្ឌចាំបាច់ឱ្យរាងកាយងាកមកប្រើប្រាស់ជាតិខ្លាញ់ដែលស្តុកទុកធ្វើជាថាមពលវិញ។ ការគ្រប់គ្រងភាពតានតឹងតាមរយៈការធ្វើសមាធិខ្លីៗក៏ជួយកាត់បន្ថយអ័រម៉ូនកទីសូល ដែលជាដើមហេតុនៃការកកកុញខ្លាញ់ក្បាលពោះ។
ជាចុងក្រោយ ការឈប់ប្រើប្រាស់ទូរស័ព្ទដៃមួយម៉ោងមុនពេលគេង នឹងជួយការពារភ្នែកពីពន្លឺពណ៌ខៀវដែលរំខានដល់អ័រម៉ូនគ្រប់គ្រងការឆ្អែត និងការឃ្លាន។ ការអនុវត្តតាមបច្ចេកទេសទាំងនេះមិនត្រឹមតែជួយឱ្យអ្នកស្រកទម្ងន់បានយ៉ាងងាយស្រួលប៉ុណ្ណោះទេ ប៉ុន្តែថែមទាំងជួយឱ្យអ្នកភ្ញាក់ឡើងជាមួយអារម្មណ៍ស្រស់ស្រាយ និងរាងកាយមាំមួនជាងមុន។
ចូរចាប់ផ្ដើមកែលម្អគុណភាពនៃការគេងរបស់អ្នកនៅយប់នេះ ដើម្បីឱ្យរាល់យប់ក្លាយជាពេលវេលានៃការកសាងរាងកាយក្នុងក្ដីស្រមៃរបស់អ្នក៕