យោងតាមការផ្សាយរបស់សារព័ត៌មានបរទេស ការរួមភេទមិនត្រឹមតែជាការបញ្ចេញអារម្មណ៍ស្និទ្ធស្នាលរវាងដៃគូប៉ុណ្ណោះទេ ប៉ុន្តែយោងតាមការស្រាវជ្រាវអន្តរជាតិ វាប្រៀបបាននឹង “ថ្នាំទិព្វ” ដែលផ្ដល់អត្ថប្រយោជន៍យ៉ាងមហាសាលដល់រាងកាយ និងផ្លូវចិត្ត។
សកម្មភាពផ្លូវភេទជាប្រចាំជួយឱ្យរាងកាយសមសួន និងរឹងមាំ ព្រោះវាជាការហាត់ប្រាណបែប Cardio ស្រាលៗដែលជួយបង្កើនអត្រាចង្វាក់បេះដូង និងសម្រួលចរន្តឈាមបានយ៉ាងល្អ។ នៅពេលយើងមានភាពស្និទ្ធស្នាល រាងកាយនឹងបញ្ចេញអ័រម៉ូនដូប៉ាមីន ដែលជាអ័រម៉ូនភ្នាក់ងារនៃសុភមង្គល ជួយកាត់បន្ថយភាពឯកោ និងធ្វើឱ្យអ្នកមានស្មារតីស្រស់ស្រាយរាល់ពេលភ្ញាក់ពីដំណេក។
ក្រៅពីអារម្មណ៍សប្បាយរីករាយ ការរួមភេទក៏ដើរតួនាទីយ៉ាងសំខាន់ក្នុងការបង្កើនសមត្ថភាពខួរក្បាល និងការចងចាំ តាមរយៈការជំរុញសារធាតុបញ្ជូនសរសៃប្រសាទឱ្យមានភាពមុតស្រួច។ វាក៏ជាអាថ៌កំបាំងនៃភាពក្មេងជាងវ័យ និងអាយុវែង ដោយសារវាជួយរក្សាតុល្យភាពអ័រម៉ូន និងកាត់បន្ថយហានិភ័យនៃជំងឺបេះដូង។ អ្វីដែលកាន់តែពិសេសក្នុងយុគសម័យដែលមានជំងឺរាតត្បាតនេះគឺ សកម្មភាពផ្លូវភេទ ១-២ ដងក្នុងមួយសប្តាហ៍ អាចជួយបង្កើនកម្រិតអង្គបដិប្រាណ ដែលជាខែលការពាររាងកាយពីជំងឺផ្ដាសាយ និងមេរោគផ្សេងៗបានយ៉ាងមានប្រសិទ្ធភាព។
សម្រាប់អ្នកដែលជួបប្រទះសម្ពាធការងារខ្លាំង ការរួមភេទគឺជា “ថ្នាំបំបាត់ស្ត្រេស” ដ៏ពូកែបំផុត ព្រោះវាជួយកាត់បន្ថយអ័រម៉ូនកទីសូល ដែលបង្កភាពតានតឹង និងជំនួសមកវិញនូវសារធាតុដែលជួយឱ្យរាងកាយសម្រាក និងគេងលក់បានយ៉ាងស្កប់ស្កល់។
ទោះជាយ៉ាងណា ការស្រាវជ្រាវបានបញ្ជាក់ថា ទំនាក់ទំនងនេះដើរតួទន្ទឹមគ្នា ពោលគឺការរួមភេទជួយឱ្យសុខភាពល្អ ហើយអ្នកដែលមានសុខភាពល្អស្រាប់ ក៏តែងតែមានជីវិតផ្លូវភេទដែលមានគុណភាពខ្ពស់ផងដែរ៕