យោងតាមការផ្សាយរបស់សារព័ត៌មានបរទេស ការផឹកទឹកឱ្យបានគ្រប់គ្រាន់គឺជាគន្លឹះដ៏សំខាន់សម្រាប់ស្បែកភ្លឺថ្លា និងរាងកាយមានសុខភាពល្អ ប៉ុន្តែសម្រាប់មនុស្សជាច្រើន ជាពិសេសនារីការិយាល័យ ការសម្រេចឱ្យបាននូវគោលដៅផឹកទឹកជារឿងពិបាក។
ដើម្បីដោះស្រាយបញ្ហានេះ លោកអ្នកអាចសាកល្បងបន្ថែមរសជាតិធម្មជាតិដូចជា ក្រូចឆ្មារ តាសក់ ឬស្លឹកជីរអង្កាម ចូលក្នុងទឹកដើម្បីកុំឱ្យទ្រលាន់ និងទទួលបានវីតាមីនបន្ថែម។ ការប្រើប្រាស់បច្ចេកវិទ្យាដូចជា កម្មវិធីរំលឹកក្នុងទូរស័ព្ទ ឬការទិញដបទឹកដែលមានសញ្ញាសម្គាល់ម៉ោង ក៏ជាវិធីសាស្ត្រដ៏រីករាយដែលជួយជំរុញឱ្យអ្នកផឹកទឹកបានទៀងទាត់ដូចជាកំពុងលេងហ្គេមប្រមូលពិន្ទុ។
ការបង្កើតទម្លាប់ផឹកទឹកមួយកែវភ្លាមៗក្រោយភ្ញាក់ពីគេង និង ៣០ នាទីមុនពេលញ៉ាំអាហារ មិនត្រឹមតែជួយជំរុញប្រព័ន្ធរំលាយអាហារប៉ុណ្ណោះទេ ប៉ុន្តែថែមទាំងជួយឱ្យអ្នកមានអារម្មណ៍ឆ្អែតលឿន និងគ្រប់គ្រងទម្ងន់បានយ៉ាងល្អ។ តិចនិកសំខាន់មួយទៀតគឺត្រូវ «ក្រេបទឹកបន្តិចៗតែឱ្យបានញឹកញាប់» ជាជាងការផឹកម្ដងច្រើនៗ ដែលនាំឱ្យរាងកាយបញ្ចេញចោលវិញអស់។ ក្រៅពីការផឹកផ្ទាល់ លោកអ្នកក៏អាចបំពេញជាតិទឹកតាមរយៈការញ៉ាំបន្លែផ្លែឈើដែលមានជាតិទឹកខ្ពស់ដូចជា ឪឡឹក ឬប៉េងប៉ោះ និងការជ្រើសរើសប្រើប្រាស់កែវដែលអ្នកចូលចិត្ត ដើម្បីធ្វើឱ្យការផឹកទឹកក្លាយជាភាពរីករាយប្រចាំថ្ងៃ។
ដើម្បីដឹងពីបរិមាណទឹកពិតប្រាកដដែលរាងកាយអ្នកត្រូវការ លោកអ្នកអាចប្រើរូបមន្តងាយៗគឺ៖ ទម្ងន់ខ្លួន (គីឡូក្រាម) ៣៣ = បរិមាណទឹក (លីត្រ)។ ជាឧទាហរណ៍ បើអ្នកមានទម្ងន់ ៥០ គីឡូក្រាម អ្នកគួរផឹកទឹកប្រហែល ១.៦ លីត្រក្នុងមួយថ្ងៃ។ ការធ្វើតាមការគណនា និងតិចនិកទាំងនេះ នឹងជួយឱ្យស្បែករបស់អ្នកមានសំណើម ប្រព័ន្ធរំលាយអាហារដើរស្រួល និងមានអារម្មណ៍ស្រស់ស្រាយពេញមួយថ្ងៃ៕