យោងតាមការផ្សាយរបស់សារព័ត៌មានបរទេស ការចាប់ផ្ដើមថ្ងៃថ្មីជាមួយនឹងភេសជ្ជៈដែលត្រឹមត្រូវ គឺជាវិធីសាស្ត្រដ៏មានប្រសិទ្ធភាពបំផុតក្នុងការ “ដាស់” ប្រព័ន្ធបញ្ចេញចោលឱ្យធ្វើការបានល្អ។ ថ្លើម និងតម្រងនោម គឺជាតម្រងធម្មជាតិរបស់រាងកាយដែលដើរតួក្នុងការចម្រោះជាតិពុលចេញពីឈាម រក្សាតុល្យភាពទឹក និងបញ្ចេញកាកសំណល់ដែលមិនត្រូវការចោល។
នៅពេលសរីរាង្គទាំងពីរនេះមានសុខភាពល្អ វានឹងជួយឱ្យស្បែកភ្លឺថ្លា បង្កើនថាមពលរាងកាយ និងពង្រឹងប្រព័ន្ធភាពស៊ាំឱ្យកាន់តែរឹងមាំដើម្បីប្រឆាំងនឹងជំងឺផ្សេងៗ។
ភេសជ្ជៈទីមួយដែលគួរជ្រើសរើសគឺ ទឹកក្ដៅឧណ្ហៗលាយក្រូចឆ្មារ ដែលសម្បូរទៅដោយអាស៊ីតស៊ីទ្រីក ជួយរំញោចថ្លើមឱ្យបញ្ចេញជាតិពុល និងបង្កើនការផលិតអង់ស៊ីមរំលាយអាហារបានយ៉ាងឆាប់រហ័ស។ បន្ទាប់មកគឺ ទឹកខ្ញីលាយទឹកឃ្មុំ ដែលមានសារធាតុប្រឆាំងការរលាកដ៏មានឥទ្ធិពល ជួយការពារកោសិកាថ្លើមពីការខូចខាត និងជួយឱ្យចរន្តឈាមរត់ទៅកាន់តម្រងនោមបានកាន់តែល្អប្រសើរ។ ជម្រើសចុងក្រោយគឺ ទឹកក្រូចឆ្មារលាយម្សៅរមៀត ដែលមានសារធាតុឃឺឃ្យូមីន ជាឱសថទិព្វសម្រាប់ជួសជុលកោសិកាថ្លើមដែលរងការខូចខាត និងទប់ស្កាត់ការកកកុញនៃជាតិខ្លាញ់ក្នុងថ្លើម។
ដើម្បីទទួលបានប្រសិទ្ធភាពខ្ពស់បំផុត លោកអ្នកគួរទទួលទានភេសជ្ជៈទាំងនេះនៅពេលពោះទទេ ភ្លាមៗក្រោយពេលភ្ញាក់ពីគេង និងមុនពេលញ៉ាំអាហារពេលព្រឹកប្រហែល ៣០ នាទី ដើម្បីឱ្យរាងកាយបឺតស្រូបសារធាតុចិញ្ចឹមបានល្អ និងលាងសម្អាតកាកសំណល់ដែលកកកុញក្នុងរយៈពេលមួយយប់។
ការអនុវត្តទម្លាប់សាមញ្ញនេះជារៀងរាល់ថ្ងៃ គឺជាការវិនិយោគដ៏ចំណេញបំផុតសម្រាប់សុខភាពសរីរាង្គខាងក្នុង និងជួយឱ្យអ្នកមានអារម្មណ៍ស្រស់ស្រាយពេញមួយថ្ងៃ៕