យោងតាមការផ្សាយរបស់សារព័ត៌មានបរទេស ទូខោអាវដែលពេញណែនតាន់តាប់ មិនមែនមានន័យថាអ្នកសម្បូរខោអាវស្លៀកនោះទេ ប៉ុន្តែវាអាចជា “ឧបសគ្គ” ដែលធ្វើឱ្យអ្នកពិបាករៀបចំខ្លួន និងបាត់បង់ភាពជឿជាក់។ ការជម្រះសម្អាតរបស់ដែលមិនចាំបាច់ចេញ គឺជាជំហានដំបូងដើម្បីកសាងស្ទីលតែងខ្លួនឱ្យកាន់តែមានរបៀប និងទាក់ទាញ។
របស់ ៧ យ៉ាងដែលអ្នកគួរកម្ចាត់ចោលរួមមាន៖ ខោអាវដែលលែងត្រូវនឹងទំហំខ្លួន (តឹងពេក ឬធំពេក) ខោអាវដែលមានស្នាមប្រឡាក់ ឬធ្លុះដាច់ដែលមិនអាចជួសជុលបាន អាវយឺតដែលបែកព្រុយ ឬយារបាត់ទ្រង់ទ្រាយ និងស្បែកជើងដែលពាក់ទៅឈឺជើង ឬសឹកបាតខ្លាំង។ ក្រៅពីនេះ អ្នកក៏គួរកម្ចាត់ខោអាវដែលទិញមកហើយមិនដែលពាក់សោះក្នុងរយៈពេលមួយឆ្នាំ ខោអាវដែលលែងត្រូវនឹងវ័យ ឬចំណង់ចំណូលចិត្តបច្ចុប្បន្ន និងឈុតក្នុងដែលយារបាត់គុណភាព ដែលប៉ះពាល់ដល់រាងរៅខាងក្រៅរបស់អ្នក។
នៅពេលដែលអ្នកកម្ចាត់របស់ទាំងនេះចេញ លោកអ្នកនឹងមើលឃើញពីរបស់ដែលអ្នកពិតជាត្រូវការ និងចូលចិត្ត ដែលជួយឱ្យការជ្រើសរើសខោអាវប្រចាំថ្ងៃចំណាយពេលតិច និងមានភាពច្នៃប្រឌិតជាងមុន។
ការរៀបចំទូខោអាវឡើងវិញដោយផ្ដោតលើគុណភាពជាជាងបរិមាណ នឹងជួយឱ្យអ្នកមានអារម្មណ៍ស្រស់ស្រាយ និងមើលទៅមានភាពជឿជាក់គ្រប់ពេលដែលចេញក្រៅផ្ទះ៕