យោងតាមការផ្សាយរបស់សារព័ត៌មានបរទេស ទោះបីជាទឹកឃ្មុំត្រូវបានចាត់ទុកជា “ឱសថទិព្វ” ពីធម្មជាតិសម្រាប់សុខភាព និងសម្រស់ ប៉ុន្តែវាមិនមែនជាអាហារសុវត្ថិភាពសម្រាប់មនុស្សគ្រប់គ្នានោះទេ។ សារធាតុចិញ្ចឹម និងបាក់តេរីមួយចំនួនដែលមានក្នុងទឹកឃ្មុំ អាចបង្កជាគ្រោះថ្នាក់ដល់អាយុជីវិត ឬធ្វើឱ្យជំងឺប្រចាំកាយកាន់តែធ្ងន់ធ្ងរ ប្រសិនបើអ្នកស្ថិតក្នុងក្រុមមនុស្សដែលមានលក្ខណៈរាងកាយមិនអំណោយផល។
ក្រុមដែលត្រូវប្រុងប្រយ័ត្នបំផុតគឺ កុមារដែលមានអាយុក្រោម ១ ឆ្នាំ ព្រោះទឹកឃ្មុំអាចមានផ្ទុកស្ប៉ាបាក់តេរី ដែលបង្កជាជំងឺពុលអាហារធ្ងន់ធ្ងរដល់ទារក ដោយសារប្រព័ន្ធរំលាយអាហារពួកគេនៅខ្ចី មិនទាន់អាចកម្ចាត់មេរោគនេះបានឡើយ។ បន្ទាប់មកគឺអ្នកជំងឺទឹកនោមផ្អែម ដែលត្រូវកម្រិតការប្រើប្រាស់ដាច់ខាត ព្រោះទឹកឃ្មុំសម្បូរទៅដោយជាតិស្ករហ្វ្រុចតូស និងគ្លុយកូសខ្ពស់ ដែលអាចធ្វើឱ្យកម្រិតជាតិស្ករក្នុងឈាមហក់ឡើងខ្ពស់ភ្លាមៗបង្កជាគ្រោះថ្នាក់។ ចំពោះអ្នកដែលមានប្រវត្តិអាឡែស៊ីជាមួយលម្អងផ្កា ក៏អាចជួបប្រទះប្រតិកម្មធ្ងន់ធ្ងរដូចជា ហើមបបូរមាត់ រមាស់ស្បែក ឬថប់ដង្ហើមភ្លាមៗក្រោយពេលញ៉ាំទឹកឃ្មុំផងដែរ។
ក្រៅពីនេះ ក្រុមមនុស្សដែលលើសទម្ងន់ មនុស្សវ័យចំណាស់ និងអ្នកដែលមានជំងឺថ្លើម គួរកាត់បន្ថយការញ៉ាំទឹកឃ្មុំ ព្រោះថាមពលកាឡូរី និងជាតិស្ករដ៏ច្រើនអាចធ្វើឱ្យពិបាកគ្រប់គ្រងទម្ងន់ និងប៉ះពាល់ដល់តុល្យភាពជាតិខ្លាញ់ក្នុងសរីរាង្គ។ ស្ត្រីមានផ្ទៃពោះ និងអ្នកដែលមានបញ្ហាក្រពះ-ពោះវៀនរ៉ាំរ៉ៃ ក៏អាចជួបបញ្ហាមានការប្រែប្រួលសកម្មភាពបាក់តេរីក្នុងពោះវៀន ដែលនាំឱ្យហើមពោះ ឬរាករូស។
ជាចុងក្រោយ អ្នកដែលកំពុងប្រើប្រាស់ថ្នាំបញ្ចុះសម្ពាធឈាម ឬអ្នកដែលទើបតែវះកាត់រួច គួរពិគ្រោះជាមួយគ្រូពេទ្យជាមុន ដើម្បីចៀសវាងអន្តរកម្មរវាងជាតិស្ករក្នុងទឹកឃ្មុំ និងប្រសិទ្ធភាពរបស់ឱសថដែលកំពុងប្រើប្រាស់។
ការយល់ដឹងពីលក្ខខណ្ឌសុខភាពផ្ទាល់ខ្លួន គឺជាគន្លឹះក្នុងការប្រើប្រាស់ទឹកឃ្មុំឱ្យក្លាយជាឱសថពិតប្រាកដ និងចៀសផុតពីផលវិបាកជាយថាហេតុ៕