យោងតាមការផ្សាយរបស់សារព័ត៌មានបរទេស តើលោកអ្នកធ្លាប់ឆ្ងល់ទេថា ហេតុអ្វីបានជាក្តាមចំហុយនៅភោជនីយដ្ឋានល្បីៗមានរសជាតិផ្អែមឆ្ងាញ់ និងគ្មានក្លិនឆ្អាតទាល់តែសោះ? អាថ៌កំបាំងមិនត្រឹមតែស្ថិតលើភាពស្រស់នៃក្តាមប៉ុណ្ណោះទេ ប៉ុន្តែគឺស្ថិតលើបច្ចេកទេសសម្អាតយ៉ាងសម្រិតសម្រាំងបំផុត។
ដើម្បីទទួលបានក្តាមដែលមានគុណភាពខ្ពស់ លោកអ្នកត្រូវអនុវត្តតាមគោលការណ៍ “ទឹកហូរ” ជាដាច់ខាត ដោយជៀសវាងការត្រាំក្តាមក្នុងទឹកស្ងប់ ព្រោះវានឹងធ្វើឱ្យក្តាមស្រូបយកមេរោគ និងក្លិនឆ្អាតចូលទៅក្នុងសាច់វិញ។ ការបើកទឹកម៉ាស៊ីនឱ្យហូរលើក្តាមជានិច្ចក្នុងពេលសម្អាត គឺជាវិធីសាស្ត្រដ៏ត្រឹមត្រូវបំផុតដើម្បីជម្រះរំអិល និងភាពកខ្វក់ចេញភ្លាមៗ។
ការសម្អាតផ្នែកខាងក្នុងគឺជាដំណាក់កាលដ៏សំខាន់ដែលមិនអាចរំលងបាន។ បន្ទាប់ពីលាងខាងក្រៅរួច លោកអ្នកត្រូវបកសំបកចេញ រួចប្រើសមដើម្បីទាញយក “ថង់ក្រពះ” ដែលនៅចំកណ្តាលខ្លួនចេញឱ្យអស់ ព្រោះវាជាកន្លែងកខ្វក់មិនអាចបរិភោគបាន។ ក្នុងពេលជាមួយគ្នា ត្រូវពិនិត្យពងក្តាមដោយយកផ្នែកដែលខ្មៅៗចេញ និងរក្សាទុកតែពងពណ៌លឿងភ្លឺ ដើម្បីជៀសវាងរសជាតិល្វីង។ ចំណុចស្លាប់រស់ដែលជួយបំបាត់ក្លិនភក់បាន ១០០% គឺការដក “ព្រុយក្តាម” និង “ស្លាបពោះ” ចេញឱ្យអស់ពីខ្លួនក្តាម ព្រោះកន្លែងទាំងនេះគឺជាជម្រកនៃភក់ និងក្លិនស្អុយ ដែលអាចរាលដាលពាសពេញសាច់ក្តាមនៅពេលប៉ះកម្ដៅចំហុយ។
ក្រោយពេលដកផ្នែកមិនល្អចេញអស់ហើយ លោកអ្នកគួរប្រើច្រាសដុសធ្មេញថ្មី ដើម្បីដុសសម្អាតតាមចន្លោះជើង និងផ្នែកខាងក្រោយសំបកឱ្យបានហ្មត់ចត់ រួចលាងជម្រះក្រោមទឹកហូរម្ដងទៀត។ អាថ៌កំបាំងចុងក្រោយដើម្បីឱ្យសាច់ក្តាមរឹងមាំ និងស្រួយឆ្ងាញ់ គឺការជ្រលក់ក្តាមក្នុង “ទឹកសូដាត្រជាក់” ដែលជាតិហ្គាសក្នុងសូដានឹងជួយជម្រះរំអិលដែលនៅសេសសល់ ខណៈភាពត្រជាក់ធ្វើឱ្យសាច់ក្តាមប្រែជារឹងណែន។
ជាកិច្ចបញ្ចប់ ការដុសខាត់ជាមួយអំបិលបន្តិចនឹងជួយសម្លាប់បាក់តេរី និងកម្ចាត់ក្លិនឆ្អាតបានយ៉ាងមានប្រសិទ្ធភាព ធ្វើឱ្យក្តាមរបស់លោកអ្នកប្រែជាស្អាតបរិសុទ្ធ និងត្រៀមខ្លួនសម្រាប់ម្ហូបដ៏ឈ្ងុយឆ្ងាញ់៕