យោងតាមការផ្សាយរបស់សារព័ត៌មានបរទេស គ្រាប់ធញ្ញជាតិមិនត្រឹមតែជាអាហារសម្រន់ដ៏ឆ្ងាញ់ពិសាប៉ុណ្ណោះទេ ប៉ុន្តែវាក៏ជាឱសថ ធម្មជាតិដែលជួយពន្យារភាពចាស់ និងការពាររាងកាយពីជំងឺផ្សេងៗតាមរយៈសារធាតុចិញ្ចឹមដ៏សម្បូរបែប។
ចាប់ផ្ដើមពីគ្រាប់អាល់ម៉ុនដែលជាអ្នកការពារស្បែកដ៏ពូកែ វាសម្បូរទៅដោយវីតាមីន និងអាស៊ីតខ្លាញ់ចាំបាច់ដែលជួយការពារស្បែកពីកាំរស្មីព្រះអាទិត្យ រក្សាសំណើម និងជួសជុលកោសិកាស្បែកឱ្យមានពន្លឺថ្លាចេញពីខាងក្នុង។ បន្ថែមពីនេះ គ្រាប់វ៉ាល់ណាត់ដើរតួនាទីយ៉ាងសំខាន់ជាអាហារបំប៉នខួរក្បាល ដោយសារវាមានអាស៊ីតខ្លាញ់អូមេហ្គា-៣ ខ្ពស់ ដែលជួយកាត់បន្ថយការរលាក និងពន្យារការចុះខ្សោយនៃសមត្ថភាពចងចាំដែលបណ្ដាលមកពីភាពចាស់។
សម្រាប់អ្នកដែលចង់គ្រប់គ្រងទម្ងន់ និងការពារកោសិកា គ្រាប់ភីស្តាស្យូគឺជាជម្រើសដ៏ល្អបំផុត ព្រោះវាសម្បូរប្រូតេអ៊ីនជួយឱ្យឆ្អែតបានយូរ និងមានសារធាតុប្រឆាំងអុកស៊ីតកម្មខ្ពស់ដែលជួយការពារ ពីការបំផ្លាញ ដែលជាមូលហេតុនៃជំងឺមហារីក និងជំងឺបេះដូង។ ស្រដៀងគ្នានេះដែរ គ្រាប់ស្វាយចន្ទីគឺជាមិត្តល្អរបស់បេះដូង ដែលជួយបញ្ចុះសម្ពាធឈាម និងកាត់បន្ថយជាតិខ្លាញ់អាក្រក់ក្នុងសរសៃឈាម ធ្វើឱ្យប្រព័ន្ធរបត់ឈាមដំណើរការបានយ៉ាងរលូន។
ជាចុងក្រោយ គ្រាប់ប្រេស៊ីលជួយពង្រឹងប្រព័ន្ធការពាររាងកាយបានយ៉ាងអស្ចារ្យតាមរយៈសារធាតុសេលេញ៉ូម ដែលជួយការពារកោសិកាមិនឱ្យខូចខាត និងជួយដល់មុខងារក្រពេញទីរ៉ូអ៊ីតឱ្យដំណើរការបានល្អ។
ការទទួលទានគ្រាប់ធញ្ញជាតិចម្រុះទាំងនេះក្នុងបរិមាណសមល្មមជារៀងរាល់ថ្ងៃ គឺជាវិធីសាស្ត្រដ៏សាមញ្ញបំផុតក្នុងការថែរក្សាសុខភាពឱ្យមាំមួន និងរក្សាសម្រស់ឱ្យនៅក្មេងជាងវ័យបានយូរអង្វែង៕