យោងតាមការផ្សាយរបស់សារព័ត៌មានបរទេស នៅពេលដែលមេអង់ស៊ីមថ្លើមឡើងខ្ពស់ វាគឺជាសញ្ញាព្រមានដ៏សំខាន់ថាថ្លើមរបស់អ្នកកំពុងរងការរលាក ឬរងការខូចខាតកោសិកា ដែលទាមទារឱ្យមានការយកចិត្តទុកដាក់លើរបបអាហារជាចម្បង។
យោងតាមអ្នកជំនាញអាហារូបត្ថម្ភ ការកាត់បន្ថយជាតិម្សៅ និងខ្លាញ់ឆ្អែត រួមជាមួយការជ្រើសរើសអាហារ “សង្គ្រោះថ្លើម” អាចជួយឱ្យកម្រិតមេអង់ស៊ីមត្រឡប់មកសភាពធម្មតាវិញ និងការពារជំងឺថ្លើមខ្លាញ់បានយ៉ាងមានប្រសិទ្ធភាព។ អាហារដែលគួរផ្ដោតជាសំខាន់រួមមានខ្ទឹមស ដែលសម្បូរទៅដោយសារធាតុអាលីស៊ីន ងប្រេងអូលីវដែលសម្បូរអាស៊ីតអូឡេអ៊ិក និងវីតាមីន ដែលជួយបញ្ចុះជាតិខ្លាញ់ក្នុងឈាម និងការពារថ្លើមពីការបំផ្លាញដោយរ៉ាឌីកាល់សេរី។ ជាមួយគ្នានេះ ខ្លាញ់ល្អអូមេហ្គា-៣ ដែលមានក្នុងត្រីសមុទ្រ (សាលម៉ុន, ធូណា) ផ្លែបឺរ និងគ្រាប់វ៉ាល់ណាត់ ក៏ដើរតួនាទីយ៉ាងសំខាន់ក្នុងការទប់ស្កាត់ការកកកុញជាតិខ្លាញ់ក្នុងថ្លើម និងកាត់បន្ថយការរលាកបានយ៉ាងប្រសើរ។
បន្ថែមពីនេះ ផ្លែប៊ឺរី និងបន្លែស្លឹកបៃតង គឺជាប្រភពនៃសារធាតុប្រឆាំងអុកស៊ីតកម្ម និងវីតាមីន ដែលជួយស្ដារមុខងារថ្លើម និងការពារកុំឱ្យមេអង់ស៊ីមថ្លើមឡើងខ្ពស់ខុសប្រក្រតី។ បន្លែអម្បូរស្ពៃដូចជាផ្កាស្ពៃខៀវ ក៏ជួយឱ្យថ្លើមផលិតអង់ស៊ីមបន្សាបជាតិពុល បានកាន់តែប្រសើរ ខណៈដែលគ្រាប់ធញ្ញជាតិផ្សេងៗផ្តល់អាស៊ីតអ៊ែឡាហ្ស៊ីក ដើម្បីការពារការខូចខាតកោសិកា។ ចំពោះភេសជ្ជៈ តែបៃតងដែលសម្បូរជាតិកាតេឈីន និងកាហ្វេដែលមិនដាក់ស្ករ ត្រូវបានរកឃើញថាអាចជួយបញ្ចុះកម្រិតមេអង់ស៊ីមថ្លើម និងការពារថ្លើមពីការរលាករ៉ាំរ៉ៃ។
ការរួមបញ្ចូលអាហារទាំងនេះទៅក្នុងរបបអាហារប្រចាំថ្ងៃ មិនត្រឹមតែជួយឱ្យកម្រិតមេអង់ស៊ីមថយចុះប៉ុណ្ណោះទេ ប៉ុន្តែថែមទាំងជួយឱ្យថ្លើមមានសុខភាពល្អមាំមួន និងជៀសផុតពីជំងឺធ្ងន់ធ្ងរនាពេលអនាគត៕