យោងតាមការផ្សាយរបស់សារព័ត៌មានបរទេសការបោកស្រោមជើងឱ្យបានត្រឹមត្រូវគឺជាគន្លឹះសំខាន់នៃអនាម័យជើងដែលមនុស្សភាគច្រើនតែងតែមើលរំលង។
តាមការណែនាំរបស់អ្នកជំនាញ ការបង្វែរខាងក្នុងចេញមុនពេលបោកសម្អាត គឺជាវិធីសាស្ត្រដ៏ល្អបំផុតក្នុងការកម្ចាត់ក្លិនជើង ព្រោះផ្នែកខាងក្នុងគឺជាកន្លែងកកកុញនៃញើស ប្រេង និងកោសិកាស្បែកងាប់ៗដែលជាចំណីរបស់បាក់តេរី។ ក្រៅពីជួយសម្អាតបានជ្រៅដល់ប្រភពមេរោគ វិធីនេះក៏ជួយការពារសរសៃអំបោះ និងពណ៌ខាងក្រៅមិនឱ្យឆាប់ចាស់ ឬឆាប់បែកព្រុយដោយសារការកកិតក្នុងម៉ាស៊ីនបោកគក់ផងដែរ។
ទោះជាយ៉ាងណាក៏ដោយ អ្នកគួរជ្រើសរើសការបោកបែបធម្មតាវិញ ប្រសិនបើស្រោមជើងនោះប្រឡាក់ដី ខ្សាច់ ឬភក់ខ្លាំងពីខាងក្រៅ ដើម្បីឱ្យទឹកសាប៊ូអាចជម្រះដីចេញបានផ្ទាល់ និងងាយស្រួល។
ដើម្បីរក្សាស្រោមជើងឱ្យនៅថ្មី និងគ្មានក្លិនរំខាន អ្នកគួរអនុវត្តទម្លាប់ងាយៗដោយចាប់ផ្ដើមពីការបង្វែរខាងក្នុងចេញភ្លាមៗក្រោយពេលដោះចេញពីជើង ដើម្បីកុំឱ្យសំណើម និងបាក់តេរីកកកុញ។ ការប្រើប្រាស់ថង់សំណាញ់បោកគក់ក៏ជាចំណុចសំខាន់ដើម្បីការពារស្រោមជើងមិនឱ្យយឺតបាត់រូបរាង និងកាត់បន្ថយការកកិតខ្លាំងជាមួយខោអាវផ្សេងៗ។
ជាចុងក្រោយ មុននឹងយកទៅហាល អ្នកគួរតែបង្វែរមកខាងត្រូវវិញ ដើម្បីឱ្យស្រោមជើងស្ងួតបានស្មើគ្នា និងរក្សារាងយឺតរបស់វាឱ្យនៅមាំល្អ។ ការយល់ដឹងពីតុល្យភាពរវាងការសម្អាតញើសពីខាងក្នុង និងធូលីពីខាងក្រៅបែបនេះ នឹងជួយឱ្យអ្នកមានជើងដែលស្រស់ថ្លា គ្មានក្លិន និងអាចប្រើប្រាស់ស្រោមជើងបានយូរអង្វែងជាងមុន៕