យោងតាមការផ្សាយរបស់សារព័ត៌មានបរទេស មជ្ឈមណ្ឌលគ្រប់គ្រង និងបង្ការជំងឺ (CDC) បានណែនាំឱ្យមនុស្សគ្រប់រូបដើរឱ្យបាន ១០,០០០ ជំហានជារៀងរាល់ថ្ងៃ (ប្រហែល ៨ គីឡូម៉ែត្រ) ដើម្បីពង្រឹងសុខភាពបេះដូង កាត់បន្ថយកូឡេស្តេរ៉ុល និងបង្ការជំងឺលើសទម្ងន់។
ទោះបីជាតួលេខ ១០,០០០ ជំហាននេះមានប្រភពដើមចេញពីយុទ្ធនាការផ្សព្វផ្សាយពាណិជ្ជកម្មឧបករណ៍វាស់ជំហានរបស់ជប៉ុនកាលពីឆ្នាំ ១៩៦៥ ក៏ដោយ ប៉ុន្តែការសិក្សាស្រាវជ្រាវវេជ្ជសាស្ត្រសម័យថ្មីបានបញ្ជាក់ថា វាពិតជាផ្ដល់អត្ថប្រយោជន៍យ៉ាងមហាសាលដល់រាងកាយ រួមមានការបង្កើនកម្លាំងសាច់ដុំ ជួយឱ្យសន្លាក់មានភាពបត់បែន សម្រួលដល់លំហូរឈាម និងជួយឱ្យអារម្មណ៍ស្រស់ស្រាយ គេងលក់ស្កប់ស្កល់ជាងមុន។
អ្វីដែលគួរឱ្យកត់សម្គាល់បំផុតនោះគឺ ការដើរឱ្យបានច្រើនជំហានត្រូវបានផ្សារភ្ជាប់ទៅនឹងការកាត់បន្ថយហានិភ័យនៃជំងឺពុកឆ្អឹង និងការបាត់បង់ការចងចាំតាមវ័យ។ ការសិក្សានៅឆ្នាំ ២០២២ បានរកឃើញថា ចំនួនជំហានកាន់តែច្រើន ហានិភ័យនៃការស្លាប់ដោយសារជំងឺផ្សេងៗកាន់តែថយចុះ ជាពិសេសប្រសិនបើអ្នកដើរក្នុងល្បឿនលឿនចន្លោះពី ៣០ ទៅ ៦០ នាទី។ ផ្ទុយទៅវិញ គ្រូពេទ្យបានចាត់ទុកការដើរតិចជាង ៥,០០០ ជំហានក្នុងមួយថ្ងៃថាជា “ការរស់នៅបែបអសកម្ម” ដែលងាយប្រឈមនឹងបញ្ហាសុខភាព។
ដើម្បីចាប់ផ្ដើម អ្នកគួរប្រើកម្មវិធីទូរស័ព្ទដើម្បីតាមដានជំហានបច្ចុប្បន្ន រួចបង្កើនចំនួនជំហានបន្តិចម្ដងៗពី ៥០០ ទៅ ១,០០០ ជំហានជារៀងរាល់សប្តាហ៍ ដើម្បីឱ្យរាងកាយស៊ាំទៅនឹងការផ្លាស់ប្តូរដ៏ល្អនេះ៕