អាថ៌កំបាំងកម្ចាត់ខ្លាញ់ក្បាលពោះ ៖ ហាត់ប្រាណឲ្យត្រូវបច្ចេកទេស និងរស់នៅឲ្យមានវិន័យ

ការកម្ចាត់ខ្លាញ់ក្បាលពោះឱ្យមានប្រសិទ្ធភាព មិនមែនពឹងផ្អែកតែលើការហាត់ប្រាណសាច់ដុំពោះ តែមួយមុខនោះទេ ប៉ុន្តែវាទាមទារការរួមបញ្ចូលគ្នារវាងការដុតរំលាយកាឡូរី និងការគ្រប់គ្រងរបបអាហារ ។

នេះគឺជាវិធីសាស្ត្រហាត់ប្រាណដែលជួយឱ្យឆាប់ស្រកក្បាលពោះ៖

១. ការហាត់ប្រាណបែបដុតរំលាយខ្លាញ់

ការហាត់ប្រាណដែលធ្វើឱ្យចង្វាក់បេះដូងដើរញាប់ គឺជាគន្លឹះចម្បងក្នុងការដុតរំលាយជាតិខ្លាញ់ពេញរាងកាយ រួមទាំងក្បាលពោះផងដែរ៖

 -ការរត់ ឬដើរលឿន ៖ ជាវិធីងាយៗដែលជួយដុតកាឡូរីបានច្រើន។

-ការជិះកង់ ឬហែលទឹក ៖ ជួយដុតរំលាយថាមពល និងពង្រឹងសុខភាពបេះដូង។

-HIIT (High-Intensity Interval Training)៖ ជាការហាត់ប្រាណខ្លាំងៗក្នុងរយៈពេលខ្លី ជំនាស់នឹងការសម្រាកខ្លី ដែលវាជួយដុតជាតិខ្លាញ់បានយ៉ាងលឿនបំផុត ។

២. ការហាត់ពង្រឹងសាច់ដុំ

ការមានសាច់ដុំកាន់តែច្រើន ជួយឱ្យរាងកាយដុតរំលាយថាមពលបានកាន់តែប្រសើរ ទោះបីជាពេលអ្នកកំពុងសម្រាកក៏ដោយ ៖

-Plank៖ ជួយពង្រឹងសាច់ដុំពោះឱ្យណែន និងរាបស្មើ ។

-Squats និង Lunges៖ ការហាត់សាច់ដុំធំៗដូចជា សាច់ដុំជើង ជួយបង្កើនល្បឿននៃការដុតរំលាយអាហារក្នុងរាងកាយ ។

៣. ការគ្រប់គ្រងរបបអាហារ និងទម្លាប់រស់នៅ

ការហាត់ប្រាណនឹងមិនទទួលបានផលល្អឡើយ ប្រសិនបើគ្មានការគ្រប់គ្រងចំណីអាហារ៖

-បរិភោគអាហារដែលមានសុខភាពល្អ៖ ផ្ដោតលើបន្លែ ផ្លែឈើ និងអាហារដែលមានជាតិប្រូតេអ៊ីនខ្ពស់។

-កាត់បន្ថយជាតិស្ករ និងម្សៅ៖ ជៀសវាងភេសជ្ជៈផ្អែម និងអាហារកែច្នៃដែលងាយបង្កឱ្យកកកុញខ្លាញ់ក្បាលពោះ។

-គេងឱ្យបានគ្រប់គ្រាន់៖ ការសម្រាកមិនគ្រប់គ្រាន់ ធ្វើឱ្យរាងកាយផលិតអរម៉ូនស្ត្រេស ដែលបណ្ដាលឱ្យឆាប់ឡើងក្បាលពោះ។

អ្នកគួរហាត់ប្រាណឱ្យបានទៀងទាត់យ៉ាងហោចណាស់ ១៥០ នាទីក្នុងមួយសប្តាហ៍ ដើម្បីឃើញលទ្ធផលជាក់ស្តែង ។