យោងតាមការផ្សាយរបស់សារព័ត៌មានបរទេស ការយល់ដឹងពីវិធីសាស្ត្រជ្រើសរើសអាហារញ៉ាំនៅពេលយប់ជ្រៅ គឺជាគន្លឹះដ៏សំខាន់សម្រាប់អ្នកដែលចង់រក្សារាង និងសុខភាពក្រពះឱ្យបានល្អ។
នៅពេលដែលភាពស្រេកឃ្លានមិនអាចទ្រាំទ្របាន ការជ្រើសរើសផ្លែឈើដែលមានជាតិស្ករទាប និងសម្បូរជាតិសរសៃដូចជា ផ្លែប៉ោម ឬត្របែក ក្នុងបរិមាណសមល្មម គឺជាជម្រើសដំបូងដែលជួយឱ្យអ្នកឆ្អែតបានលឿនដោយមិនផ្ដល់ថាមពលលើសលប់។ ជាមួយគ្នានេះ ប្រូតេអ៊ីនដែលងាយរំលាយបានលឿនដូចជា ស៊ុតស្ងោរ ឬស៊ុតចំហុយ ក៏ជាជម្រើសដ៏វិសេសវិសាល ដែលមិនបង្កបន្ទុកធ្ងន់ដល់ប្រព័ន្ធរំលាយអាហារក្នុងកំឡុងពេលសម្រាក។
សម្រាប់អ្នកដែលមិនចូលចិត្តទំពារ ការជ្រើសរើសភេសជ្ជៈដែលមានប្រូតេអ៊ីនខ្ពស់ និងជាតិខ្លាញ់ទាប ដូចជាទឹកដោះគោសណ្ដែកសៀងធម្មជាតិ ឬយ៉ាអួរសុទ្ធគ្មានជាតិស្ករ នឹងជួយសម្រួលដល់ការឃ្លានបានយ៉ាងមានប្រសិទ្ធភាព។ ក្នុងករណីដែលអ្នកចង់បានអាហារសម្រន់ដែលមានភាពស្រួយស្រេះ ការប្តូរពីអាហារកែច្នៃមកជាគ្រាប់ធញ្ញជាតិអាំងដូចជា គ្រាប់អាល់ម៉ុន ដែលសម្បូរទៅដោយខ្លាញ់ល្អ និងជាតិសរសៃ នឹងជួយទប់ស្កាត់ចំណង់អាហារបានយ៉ាងយូរអង្វែង។ បន្ថែមពីនេះ ប្រសិនបើអ្នកមានអារម្មណ៍ថាឃ្លានខ្លាំង ការញ៉ាំនំប៉័ងស្រូវសាលីមួយចំណិតតូចជាមួយសាច់ត្រីធូណា ឬទ្រូងមាន់ នឹងផ្ដល់នូវកាបូអ៊ីដ្រាតដ៏សំបូរបែបដែលជួយឱ្យរាងកាយមានស្ថិរភាព និងការពារបញ្ហាច្រាលអាស៊ីតក្រពះបានយ៉ាងល្អប្រសើរ។
ទោះជាយ៉ាងណាក៏ដោយ ដំណោះស្រាយប្រកបដោយចីរភាពបំផុតគឺការញ៉ាំអាហារពេលល្ងាចឱ្យមានតុល្យភាព និងការចូលគេងឱ្យបានលឿន ដើម្បីគ្រប់គ្រងអ័រម៉ូនឃ្លានឱ្យនៅថេរ៕