យោងតាមការផ្សាយរបស់សារព័ត៌មានបរទេស ការរក្សាសុខភាពផ្លូវភេទឱ្យមានតុល្យភាពគឺជាកត្តាសំខាន់បំផុតសម្រាប់ស្ត្រី ជាពិសេសអ្នកដែលមានវ័យចាប់ពី ៤០ ឆ្នាំឡើងទៅ ដើម្បីការពាររាងកាយពីការឆ្លងមេរោគ និងភាពចាស់មុនអាយុ។
បន្ថែមពីលើអំឡុងពេលមករដូវ អ្នកជំនាញបានណែនាំឱ្យស្ត្រីគួរផ្អាកសកម្មភាពផ្លូវភេទក្នុង ៣ ករណីផ្សេងទៀតដែលជារឿយៗត្រូវបានមើលរំលង។ ពេលវេលាទីមួយគឺរយៈពេល ៣ ថ្ងៃដំបូងបន្ទាប់ពីមករដូវឈប់ទាំងស្រុង ព្រោះទោះបីជាឈាមលែងហូរ ប៉ុន្តែស្រទាប់ស្បូនទើបតែនឹងចាប់ផ្ដើមបង្កើតឡើងវិញ ដែលជាដំណាក់កាលងាយរងគ្រោះបំផុតចំពោះការឆ្លងបាក់តេរីដែលអាចបង្កជាជំងឺរលាកអាងត្រគាក ឬជំងឺស្រទាប់ស្បូនដុះខុសកន្លែង។
ករណីទីពីរដែលគួរចៀសវាងគឺបន្ទាប់ពីទទួលទានគ្រឿងស្រវឹងច្រើនហួសប្រមាណ ដោយសារជាតិអាល់កុលកាត់បន្ថយការបញ្ចេញទឹករំអិលធម្មជាតិ បង្កឱ្យមានការកកិតខ្លាំង ងាយរងរបួស និងធ្វើឱ្យអតុល្យភាពអ័រម៉ូនក្នុងរាងកាយកាន់តែអាក្រក់ទៅៗ។ ចំណែកឯករណីទីបីគឺនៅពេលដែលរាងកាយអស់កម្លាំងខ្លាំង ឬស្ថិតក្នុងស្ថានភាពស្រ្តេសខ្លាំង ដែលការបង្ខំចិត្តរួមភេទក្នុងពេលប្រព័ន្ធភាពស៊ាំចុះខ្សោយនឹងរំខានដល់ដំណើរការអ័រម៉ូន នាំឱ្យសម្រស់ឆាប់ចាស់ជាងវ័យ និងប៉ះពាល់ដល់សុខភាពផ្លូវចិត្ត។
ការផ្ដល់ពេលវេលាឱ្យរាងកាយបានសម្រាក និងងើបរើបឡើងវិញ គឺជាគន្លឹះដ៏សំខាន់ដែលជួយឱ្យស្ត្រីរក្សាបាននូវសម្រស់ និងសុខភាពមាំមួនយូរអង្វែង៕