យោងតាមការផ្សាយរបស់សារព័ត៌មានបរទេស ការលើកទឹកចិត្តដែលរឹងមាំបំផុត គឺជាការលើកទឹកចិត្តដែលកើតចេញពីខ្លួនឯង។ ដើម្បីកសាងភាពជោគជ័យប្រកបដោយនិរន្តរភាព អ្នកត្រូវចាប់ផ្ដើមពីការ កំណត់គោលដៅដែលមានអត្ថន័យ ពោលគឺមិនមែនធ្វើដើម្បីតែលុយ ឬកេរ្តិ៍ឈ្មោះនោះទេ ប៉ុន្តែធ្វើដើម្បីមនុស្សដែលអ្នកស្រលាញ់ ឬដើម្បីតម្លៃខ្លួនឯង។
ជាមួយគ្នានេះ ការបែងចែកគោលដៅធំៗឱ្យទៅជា គោលដៅតូចៗប្រចាំថ្ងៃ នឹងជួយឱ្យអ្នកមានអារម្មណ៍ថាមានវឌ្ឍនភាពជានិច្ច ដែលវានឹងបង្កើតជាទំនុកចិត្តថា “ខ្ញុំអាចធ្វើវាបាន” ដោយមិនចាំបាច់រង់ចាំការសរសើរពីអ្នកដទៃ។
ផ្នត់គំនិតសំខាន់មួយទៀត គឺការផ្លាស់ប្តូររបៀប និយាយជាមួយខ្លួនឯង។ ជំនួសឱ្យការស្ដីបន្ទោសកំហុសខ្លួនឯង ចូរប្រើពាក្យលើកទឹកចិត្តវិជ្ជមានដើម្បីពង្រឹងស្មារតី។ ការរៀនសូត្រពីបុគ្គលជោគជ័យ ក៏គួរផ្ដោតលើ វិន័យ និងវិធីសាស្ត្រការងារ របស់ពួកគេ ជាជាងការយកជីវិតខ្លួនឯងទៅប្រៀបធៀបដែលនាំឱ្យបាក់ទឹកចិត្ត។ បន្ថែមពីនេះ ការផ្ដល់ពេលវេលាឱ្យខ្លួនឯងបាន នៅស្ងប់ស្ងាត់ ឬធ្វើសមាធិ នឹងជួយឱ្យអ្នកមើលឃើញតម្លៃពិតនៃអ្វីដែលអ្នកកំពុងធ្វើកាន់តែច្បាស់។
ជាចុងក្រោយ ការសម្រេចបាននូវ សមិទ្ធផលតូចៗជារៀងរាល់ថ្ងៃ (ទោះបីជាការរៀបចំគ្រែ ឬការអានសៀវភៅ ១៥ នាទី) គឺជាការសន្សំទំនុកចិត្តដ៏មានប្រសិទ្ធភាពបំផុត។
បុរសដែលជោគជ័យពិតប្រាកដ គឺជាអ្នកដែល ជឿជាក់លើតម្លៃខ្លួនឯង ទោះបីជាគ្មាននរណាម្នាក់មើលឃើញ ឬផ្ដល់ការសរសើរក៏ដោយ។ នៅពេលដែលអ្នកអាចបង្កើតកម្លាំងចលករពីខាងក្នុងបាន នោះអ្នកនឹងអាចដើរទៅមុខដោយភាពជឿជាក់ និងមិនងាយរង្គោះរង្គើដោយសារសម្ពាធពីមជ្ឈដ្ឋានខាងក្រៅឡើយ៕