យោងតាមការផ្សាយរបស់សារព័ត៌មានបរទេស ស្នាមប្រេងដែលខ្ទាតជាប់ជុំវិញចង្ក្រានហ្គាស នៅពេលត្រូវកម្ដៅម្ដងហើយម្ដងទៀត នឹងក្លាយជាសំណល់កកកុញស្អិតខ្លាំងដែលពិបាកដុសខាត់ចេញដោយប្រើទឹកធម្មតា។
ទោះជាយ៉ាងណាក៏ដោយ អ្នកអាចដោះស្រាយបញ្ហានេះបានយ៉ាងងាយស្រួលក្នុងរយៈពេលត្រឹមតែ ៥ នាទី ដោយប្រើត្រឹមតែទឹកខ្មេះស និងទឹកក្ដៅប៉ុណ្ណោះ។ អាស៊ីតអាសេទិកស្រាលនៅក្នុងទឹកខ្មេះ រួមជាមួយកម្ដៅនៃទឹក នឹងធ្វើប្រតិកម្មគីមីដើម្បីបំបែករចនាសម្ព័ន្ធជាតិខ្លាញ់ដែលកកស្ទះឱ្យទន់រលួយយ៉ាងឆាប់រហ័ស។
ដើម្បីអនុវត្តវិធីសាស្ត្រនេះ អ្នកត្រូវលាយទឹកក្ដៅ ២០០ មិល្លីលីត្រ ជាមួយទឹកខ្មេះស ១០០ មិល្លីលីត្រ ក្នុងដបបាញ់ រួចបាញ់ល្បាយនេះឱ្យជោកលើតំបន់ដែលមានជាតិខ្លាញ់ ដោយត្រូវប្រយ័ត្នកុំឱ្យទឹកចូលក្នុងប្រព័ន្ធខ្សែភ្លើង ឬក្បាលចង្ក្រាន។ បន្ទាប់ពីទុកចោលរយៈពេល ១ ទៅ ២ នាទី ដើម្បីឱ្យអាស៊ីតធ្វើការរំលាយស្នាមប្រឡាក់រួចរាល់ អ្នកគ្រាន់តែប្រើក្រណាត់ទន់ ឬអេប៉ុងជូតសម្អាតចេញជាការស្រេច ដែលវានឹងជួយឱ្យចង្ក្រានប្រែមកជាភ្លឺរលោងដូចថ្មីវិញ។
ក្នុងករណីដែលជួបប្រទះស្នាមប្រឡាក់ដែលជាប់ក្ដាំង អ្នកអាចបន្ថែមម្សៅសូដាដុតនំ ប្រោះពីលើមុនពេលបាញ់ទឹកខ្មេះ។ ប្រតិកម្មរវាងម្សៅសូដាដែលមានលក្ខណៈជាបាស និងទឹកខ្មេះដែលមានលក្ខណៈជាអាស៊ីត នឹងបង្កើតជាពពុះដែលជួយជម្រុះជាតិខ្លាញ់ដែលជាប់ស្អិតខ្លាំងឱ្យរបូតចេញបានកាន់តែមានប្រសិទ្ធភាព។
វិធីសាស្ត្រនេះមិនត្រឹមតែចំណេញពេលវេលា និងកម្លាំងប៉ុណ្ណោះទេ ប៉ុន្តែថែមទាំងជួយឱ្យផ្ទះបាយមានអនាម័យខ្ពស់ និងបាត់ក្លិនឆ្អាតប្រេងបានយ៉ាងល្អប្រសើរទៀតផង៕