ជំងឺមហារីកសុដន់ គឺជាប្រភេទជំងឺមហារីកដែលកើតឡើងញឹកញាប់បំផុតមួយលើស្ត្រី ប៉ុន្តែវាក៏អាចកើតមានលើបុរសផងដែរ (ទោះបីជាក្នុងកម្រិតតិចតួចក៏ដោយ)។ ការកត់សម្គាល់រោគសញ្ញាបានឆាប់រហ័ស គឺជាគន្លឹះដ៏សំខាន់សម្រាប់ការព្យាបាលឱ្យជាសះស្បើយ។
ខាងក្រោមនេះ គឺជារោគសញ្ញាសំខាន់ៗដែលអ្នកគួរយកចិត្តទុកដាក់៖
១. ការប្រែប្រួលនៃរូបរាង និងទំហំសុដន់
-មានការហើម ឬផ្លាស់ប្តូរទំហំសុដន់ម្ខាង ខុសពីធម្មតា។
-រូបរាងសុដន់ប្រែជាយារ ឬខុសទ្រង់ទ្រាយភ្លាមៗ។
២. ដុំសាច់ ឬភាពរឹងខុសធម្មតា
-ស្ទាបទៅមាន ដុំរឹង នៅក្នុងសុដន់ ឬនៅក្រោមឃ្លៀក។ ដុំសាច់មហារីកភាគច្រើនមានសភាពរឹង មិនឈឺ និងមានផ្ទៃមិនរលោង (ប៉ុន្តែដុំសាច់ខ្លះក៏អាចទន់ ឬឈឺដែរ ដូច្នេះមិនត្រូវមើលរំលងឡើយ)។
៣. ការប្រែប្រួលនៅលើស្បែកសុដន់
-ស្បែកសុដន់ប្រែជាខួចចូលក្នុង (Dimpling) មើលទៅដូចស្បែកផ្លែក្រូច។
-មានសភាពក្រហម កន្ទួល ឬរបកស្បែកនៅជុំវិញក្បាលសុដន់។
-មានអារម្មណ៍ថាក្តៅ ឬហើមខ្លាំងលើស្បែកសុដន់។
៤. ការប្រែប្រួលនៃក្បាលសុដន់
-ក្បាលសុដន់ប្រែជា ខួច ឬផុសចូលក្នុង (Inverted nipple) ដែលពីមុនមកមិនដែលជាបែបនេះ។
-មានការឈឺចាប់នៅតំបន់ក្បាលសុដន់។
-មាន ទឹក ឬឈាមហូរចេញពីក្បាលសុដន់ ដោយមិនមែនជាទឹកដោះ (ជាពិសេសបើហូរតែម្ខាង)។
៥. ការឈឺចាប់
-ទោះបីជាមហារីកសុដន់ដំណាក់កាលដំបូងភាគច្រើនមិនបង្កការឈឺចាប់ ប៉ុន្តែការឈឺចាប់នៅចំណុចណាមួយនៃសុដន់ជាប់រហូត ក៏ជារោគសញ្ញាដែលត្រូវប្រុងប្រយ័ត្នផងដែរ។