យោងតាមការផ្សាយរបស់សារព័ត៌មានបរទេស ការញ៉ាំផ្លែឈើផ្អែមខ្លាំងដូចជា ស្វាយទុំ ខ្នុរ មៀន និងទុរេន ច្រើនហួសប្រមាណ គឺជាមូលហេតុមួយដែលធ្វើឱ្យអង់ស៊ីមថ្លើមកើនឡើងខុសធម្មតា។ ជាតិស្ករហ្វ្រុចតូស ខ្ពស់នៅក្នុងផ្លែឈើទាំងនេះ បង្ខំឱ្យថ្លើមត្រូវធ្វើការធ្ងន់ដើម្បីបំប្លែងវាទៅជាខ្លាញ់សម្រាប់រក្សាទុក។
ប្រសិនបើទម្លាប់នេះបន្តយូរអង្វែង វានឹងបង្កជាជំងឺ “ខ្លាញ់រុំថ្លើម” ដែលនាំឱ្យកោសិកាថ្លើមរលាក និងខូចខាត ជាពិសេសចំពោះអ្នកដែលចូលចិត្តញ៉ាំបង្កង់ក្រោយបាយល្ងាច ឬអ្នកដែលមានបញ្ហាលើសទម្ងន់ស្រាប់។
ដើម្បីថែរក្សាថ្លើមឱ្យមានសុខភាពល្អ អ្នកមិនចាំបាច់ផ្ដាច់ការញ៉ាំផ្លែឈើផ្អែមទាំងស្រុងនោះទេ ប៉ុន្តែត្រូវផ្លាស់ប្តូរទម្លាប់ខ្លះៗដូចជា៖
- ញ៉ាំក្នុងបរិមាណតិចតួច និងប្ដូរមកញ៉ាំនៅពេលព្រឹក ឬពេលរសៀលវិញ ដើម្បីឱ្យរាងកាយដុតរំលាយថាមពលបានអស់។
- ជ្រើសរើសផ្លែឈើដែលមានជាតិស្ករទាបជំនួសវិញដូចជា ត្របែក ប៉ោម ស្រកានាគ ឬក្រូចថ្លុង។
- ចៀសវាងការញ៉ាំផ្លែឈើផ្អែមភ្លាមៗបន្ទាប់ពីអាហារពេលល្ងាចដែលសម្បូរជាតិម្សៅ និងខ្លាញ់រួច។
ការផ្លាស់ប្តូររបបអាហារ រួមជាមួយការហាត់ប្រាណទៀងទាត់ នឹងជួយសម្រាលបន្ទុកថ្លើម និងការពារអ្នកពីជំងឺរលាកថ្លើមរ៉ាំរ៉ៃបានយ៉ាងមានប្រសិទ្ធភាព៕