យោងតាមការផ្សាយរបស់សារព័ត៌មានបរទេស មនុស្សជាច្រើនតែងយល់ច្រឡំថា “ការផឹកបន្តិចបន្តួចជួយឱ្យឈាមរត់ស្រួល” ឬ “ផឹកតិចៗមិនអីទេ”។ ប៉ុន្តែ ការសិក្សាស្រាវជ្រាវថ្មីៗបានបង្ហាញការពិតផ្ទុយស្រឡះ ដែលអាចធ្វើឱ្យអ្នកផ្លាស់ប្តូរទម្លាប់នៃការញ៉ាំគ្រឿងស្រវឹងជារៀងរហូត។ សូម្បីតែការទទួលទានក្នុងបរិមាណតិចតួចបំផុត ក៏អាចបង្កផលប៉ះពាល់អវិជ្ជមានដល់រាងកាយច្រើនជាងអ្វីដែលយើងធ្លាប់គិត។
តាមទិន្នន័យស្រាវជ្រាវពីសាកលវិទ្យាល័យវិទ្យាសាស្ត្រតូក្យូ ដែលបានតាមដានមនុស្សជិត ៦ ម៉ឺននាក់ បានរកឃើញថា ការផឹកស្រាបៀរត្រឹមតែ កន្លះកំប៉ុង (ឬជាតិអាល់កុល ១០ ក្រាម) បណ្តាលឱ្យសម្ពាធឈាមឡើងខ្ពស់ភ្លាមៗ។ ចំពោះសុភាពនារី សម្ពាធឈាមនឹងកើនឡើងយ៉ាងខ្លាំងជាបន្ទាត់ត្រង់តាមបរិមាណដែលបានផឹក។ ទោះបីជាការកើនឡើងនេះមើលទៅហាក់ដូចជាបន្តិចបន្តួច ប៉ុន្តែប្រសិនបើវាវាកើតឡើងជារៀងរាល់ថ្ងៃ វានឹងក្លាយជា “គ្រាប់បែកពេលវេលា” ដែលបណ្តាលឱ្យមានជំងឺដាច់សរសៃឈាមខួរក្បាល ជំងឺបេះដូង និងការខូចតម្រងនោមមុនអាយុ។
អ្វីដែលកាន់តែធ្ងន់ធ្ងរនោះ អង្គការសុខភាពពិភពលោក (WHO) បានចាត់ថ្នាក់គ្រឿងស្រវឹងថាជា “សារធាតុបង្កមហារីកក្រុមទី ១”។ នេះមានន័យថា វាមិនមាន “បរិមាណសុវត្ថិភាព” ឡើយសម្រាប់ការផឹក។ ការញ៉ាំសូម្បីតែមួយកែវក្នុងមួយថ្ងៃ ក៏អាចបង្កើនហានិភ័យនៃជំងឺមហារីកដល់ទៅ ៧ ប្រភេទ រួមមានមហារីកសុដន់ និងពោះវៀនធំជាដើម។ ដូច្នេះ ជំនឿដែលថាការផឹកក្នុងកម្រិតមធ្យមផ្តល់ផលល្អដល់សុខភាព ត្រូវបានអ្នកវិទ្យាសាស្ត្របដិសេធទាំងស្រុង ព្រោះហានិភ័យនៃជំងឺដង្កាត់មានច្រើនជាងអត្ថប្រយោជន៍ដែលទទួលបាន។ ការសម្រេចចិត្តឈប់ផឹក គឺជាជម្រើសដ៏ល្អបំផុតដើម្បីការពារអាយុជីវិតរបស់អ្នកឱ្យវែងអង្វរ៕