យោងតាមការផ្សាយរបស់សារព័ត៌មានបរទេស ចង្កឹះគឺជាឧបករណ៍បរិភោគអាហារដែលយើងប្រើប្រាស់ជារៀងរាល់ថ្ងៃ ប៉ុន្តែមនុស្សតិចណាស់ដែលចាប់អារម្មណ៍ថា សម្ភារៈរបស់វាមានឥទ្ធិពលផ្ទាល់ទៅលើអនាម័យ និងសុខភាពរយៈពេលវែង។ ការជ្រើសរើសចង្កឹះមិនបានត្រឹមត្រូវ អាចប្រែក្លាយឧបករណ៍ដួសអាហារឱ្យទៅជាប្រភពផ្ទុកមេរោគយ៉ាងស្ងៀមស្ងាត់។
ចង្កឹះឈើ ទោះបីជាមានតម្លៃថោក និងងាយស្រួលកាន់ ប៉ុន្តែវាបង្កហានិភ័យខ្ពស់។ ដោយសារឈើមានរន្ធញើសតូចៗ វាងាយនឹងស្រូបទឹក និងសំណើម ដែលជាកន្លែងផ្ដល់កំណើតដល់បាក់តេរី និងផ្សិត។ អ្វីដែលគួរឱ្យខ្លាចបំផុតនោះគឺ ផ្សិតនៅលើចង្កឹះឈើអាចផលិតជាតិពុល អាផ្លាតុកស៊ីន ដែលអង្គការសុខភាពពិភពលោក (WHO) ចាត់ថ្នាក់ជាសារធាតុបង្កមហារីកថ្លើម ហើយទោះបីជាអ្នកស្រុះទឹកក្ដៅក៏មិនអាចកម្ចាត់វាបានទាំងស្រុងដែរ។ លើសពីនេះ ចង្កឹះឈើថោកៗជារឿយៗត្រូវបានលាបពណ៌ ឬកាវដែលមានផ្ទុកសារធាតុ Formaldehyde ដែលអាចប៉ះពាល់ដល់ប្រព័ន្ធដង្ហើម និងតម្រងនោម។
ផ្ទុយទៅវិញ ចង្កឹះដែកអ៊ីណុក (ប្រភេទ 304 ឬ 316) គឺជាជម្រើសដ៏ល្អសម្រាប់សុខភាព។ ផ្ទៃដែកអ៊ីណុកមានសភាពរលោង មិនជ្រាបទឹក និងមិនមានរន្ធញើស ដែលធ្វើឱ្យមេរោគមិនអាចរស់នៅបានយូរឡើយ (ជាមធ្យមត្រឹម ២ ម៉ោង)។ វាងាយស្រួលលាងសម្អាត ធន់នឹងកម្ដៅខ្ពស់ មិនមានសារធាតុគីមីលាបពីខាងក្រៅ និងមានអាយុកាលប្រើប្រាស់បានយូររហូតដល់ ៥ ឆ្នាំ។ ដើម្បីសុវត្ថិភាព អ្នកគួរជ្រើសរើសចង្កឹះដែកដែលមានសញ្ញាបញ្ជាក់ស្តង់ដាSUS304 និងមានចង្អូរនៅចុងដើម្បីការពារការរអិលពេលចាប់អាហារ។ ការផ្លាស់ប្តូរមកប្រើចង្កឹះដែកអ៊ីណុក គឺជាជំហានសាមញ្ញមួយក្នុងការការពារគ្រួសារអ្នកពីជំងឺដែលឆ្លងតាមរយៈចំណីអាហារ៕