យោងតាមការផ្សាយរបស់សារព័ត៌មានបរទេស ស៊ុតត្រូវបានគេទទួលស្គាល់ថាជា «កំពូលអាហារ» ដោយសារវាមានផ្ទុកនូវសារធាតុចិញ្ចឹមយ៉ាងសម្បូរបែប ចាប់ពីប្រូតេអ៊ីនគុណភាពខ្ពស់ រហូតដល់វីតាមីន និងមីក្រូសារធាតុសំខាន់ៗដូចជា Lutein និង Zeaxanthin ដែលជំនួយភ្នែក ក៏ដូចជា Choline ដែលជួយដល់មុខងារខួរក្បាល។
ទោះបីជាមានអត្ថប្រយោជន៍លើសលប់យ៉ាងណាក៏ដោយ កម្រិតនៃការបរិភោគស៊ុតឱ្យបានត្រឹមត្រូវនៅតែជាសំណួរដែលមនុស្សជាច្រើនចង់ដឹង។ ជាការពិតណាស់ មិនមានការកំណត់ជាសកលសម្រាប់មនុស្សគ្រប់គ្នានោះទេ ព្រោះបរិមាណដែលគួរទទួលទានគឺអាស្រ័យលើស្ថានភាពសុខភាព របៀបរស់នៅ និងវប្បធម៌អាហារនៃប្រទេសនីមួយៗ។ ជាឧទាហរណ៍ ប្រទេសអាល្លឺម៉ង់ណែនាំឱ្យញ៉ាំត្រឹមតែ ១ គ្រាប់ក្នុងមួយសប្តាហ៍ ខណៈដែលប្រទេសជប៉ុន និងសហរដ្ឋអាម៉េរិក ចាត់ទុកការទទួលទាន ១ គ្រាប់ក្នុងមួយថ្ងៃថាជាកម្រិតសមរម្យសម្រាប់មនុស្សពេញវ័យដែលមានសុខភាពល្អ។
សម្រាប់បុគ្គលដែលគ្មានជំងឺប្រចាំកាយ ការញ៉ាំស៊ុតមួយគ្រាប់ជារៀងរាល់ថ្ងៃក្នុងក្របខ័ណ្ឌនៃរបបអាហារដែលមានតុល្យភាព គឺត្រូវបានចាត់ទុកថាមានសុវត្ថិភាព និងផ្តល់ប្រយោជន៍ដល់រាងកាយ។ ទោះជាយ៉ាងណា ក្រុមមនុស្សដែលមានហានិភ័យខ្ពស់ ដូចជាអ្នកជំងឺទឹកនោមផ្អែម ជំងឺបេះដូង ឬមានកម្រិតកូឡេស្តេរ៉ុលខ្ពស់ គួរតែមានការប្រុងប្រយ័ត្នជាងមុន ដោយអ្នកជំនាញច្រើនណែនាំឱ្យកម្រិតការញ៉ាំត្រឹមតែ ២ ទៅ ៣ គ្រាប់ប៉ុណ្ណោះក្នុងមួយសប្តាហ៍។ ចំពោះកុមារ និងស្ត្រីមានផ្ទៃពោះ ស៊ុតគឺជាប្រភពអាហារូបត្ថម្ភដ៏សំខាន់សម្រាប់ជួយដល់ការលូតលាស់ ប៉ុន្តែអ្វីដែលកាន់តែសំខាន់នោះគឺការបរិភោគឱ្យមានភាពចម្រុះ ដោយត្រូវញ៉ាំឆ្លាស់គ្នាជាមួយសាច់ ត្រី និងគ្រឿងសមុទ្រ ដើម្បីធានាថា រាងកាយទទួលបានសារធាតុចិញ្ចឹមគ្រប់គ្រាន់ពីគ្រប់ប្រភពអាហារ៕