យោងតាមការផ្សាយរបស់សារព័ត៌មានបរទេស សម្រាប់មាតាដែលកំពុងបំបៅដោះកូន ការទទួលបានរបបអាហារដែលសម្បូរទៅដោយសារធាតុជំរុញទឹកដោះគឺជាគន្លឹះដ៏សំខាន់ដើម្បីធានាថាបុត្រធីតាទទួលបានអាហារូបត្ថម្ភគ្រប់គ្រាន់ និងជួយឱ្យរាងកាយអ្នកម្តាយឆាប់ងើបឡើងវិញ។ បន្លែធម្មជាតិគឺជាជម្រើសដ៏ល្អបំផុតដែលមិនត្រឹមតែផ្តល់វីតាមីនប៉ុណ្ណោះទេ ប៉ុន្តែថែមទាំងជួយបង្កើនបរិមាណទឹកដោះដោយសុវត្ថិភាព។
បន្លែទីមួយដែលមិនអាចខ្វះបានគឺ ត្រយូងចេក ដែលត្រូវបានគេចាត់ទុកថាជាកំពូលអាហារជំរុញលំហូរទឹកដោះតាំងពីបុរាណកាលមក ដោយសារវាសម្បូរជាតិដែក កាល់ស្យូម និងផូស្វ័រ។ បន្ទាប់មកគឺ ខ្ញី ដែលជាឱសថមានរសជាតិក្តៅឧណ្ហៗ ជួយបង្កើនចរន្តឈាមឱ្យដើរស្រួល ដែលជាកត្តាសំខាន់ជំរុញឱ្យការផលិតទឹកដោះកាន់តែប្រសើរ។ សម្រាប់អ្នកម្តាយដែលមានបញ្ហាភ្នែក ឬត្រូវការថាមពលបន្ថែម ល្ពៅ គឺជាប្រភពនៃវីតាមីនអា និងជាតិសរសៃដែលជួយដល់ការរំលាយអាហារបានយ៉ាងពូកែ។
ក្រៅពីនេះ ស្លឹកម្រះព្រៅ (ឬជីរអង្កាម) និង ស្លឹកខ្ទឹម ក៏ដើរតួជាអ្នកជំនួយយ៉ាងសកម្មផងដែរ។ ស្លឹកម្រះព្រៅសម្បូរទៅដោយជាតិកាល់ស្យូមសម្រាប់បញ្ជូនទៅទារក និងជួយកាត់បន្ថយអាការៈហើមពោះរបស់អ្នកម្តាយ រីឯស្លឹកខ្ទឹមជួយចិញ្ចឹមឈាម និងធ្វើឱ្យការផលិតទឹកដោះមានប្រសិទ្ធភាពខ្ពស់។ បន្ថែមពីលើការទទួលទានបន្លែទាំងនេះ អ្នកម្តាយគួរតែផឹកទឹកឱ្យបានយ៉ាងហោចណាស់ ៨-១០ កែវក្នុងមួយថ្ងៃ សម្រាកឱ្យបានគ្រប់គ្រាន់ និងព្យាយាមបំបៅដោះកូនឱ្យបានទៀងទាត់ ដើម្បីជំរុញឱ្យរាងកាយផលិតទឹកដោះបានកាន់តែច្រើន និងមានគុណភាពល្អសម្រាប់សុខភាពបុត្រធីតា៕