យោងតាមការផ្សាយរបស់សារព័ត៌មានបរទេស ការតាមស្រឡាញ់នរណាម្នាក់ជារឿងរំភើប ប៉ុន្តែវាក៏អាចធ្វើឱ្យអ្នកមានអារម្មណ៍បារម្ភ ប្រសិនបើមិនដឹងថាដៃគូម្ខាងទៀតមានចិត្តបែបណាចំពោះយើងវិញ។ តាមពិតទៅ ស្ត្រីជារឿយៗមិននិយាយត្រង់ៗពីអារម្មណ៍របស់ខ្លួនឡើយ ប៉ុន្តែពួកគេតែងតែផ្ញើសញ្ញាវិជ្ជមានតាមរយៈសកម្មភាព និងភាសាកាយវិការដែលអ្នកអាចសង្កេតបាន។
សញ្ញាដំបូងបំផុតគឺ “ការទំនាក់ទំនង”។ ស្ត្រីដែលចាប់អារម្មណ៍លើអ្នក នឹងមិនទុកឱ្យសាររបស់អ្នកនៅទំនេរយូរឡើយ នាងនឹងឆ្លើយតបយ៉ាងរហ័ស និងព្យាយាមបន្តការសន្ទនាឱ្យបានយូរ។ ជាមួយគ្នានេះ នាងនឹងចាប់ផ្តើមចង់ដឹងពី “ស្ថានភាពទំនាក់ទំនង” របស់អ្នកតាមរយៈការសួរដោយប្រយោល ដើម្បីប្រាកដថាអ្នកពិតជាមានភាពទំនេរសម្រាប់រូបនាង។ អ្វីដែលគួរឱ្យកត់សម្គាល់បំផុតនោះគឺ “ការចងចាំ”។ ប្រសិនបើនាងអាចចាំសូម្បីតែចំណុចតូចតាចរបស់អ្នក ដូចជាអាហារដែលអ្នកចូលចិត្ត ឬថ្ងៃខែឆ្នាំកំណើត នោះមានន័យថានាងកំពុងដាក់ចិត្តដាក់កាយមកលើអ្នកយ៉ាងខ្លាំង។
ក្រៅពីសម្តី ភាសាកាយវិការក៏ជាអាថ៌កំបាំងដែលនាងពិបាកនឹងលាក់បាំង។ នៅពេលអ្នកនៅជិត ឬនិយាយពាក្យផ្អែមល្ហែម នាងនឹងបង្ហាញអាការៈ “ខ្មាសអៀន” និងព្យាយាមចៀសវាងការសម្លឹងចំភ្នែក ព្រោះខ្លាចអ្នកមើលដឹងពីអារម្មណ៍ពិត។ លើសពីនេះ នាងនឹងផ្តល់ភាពស្និទ្ធស្នាលជាពិសេស និងនៅក្បែរអ្នកជានិច្ចនៅពេលអ្នកជួបការលំបាក។
សញ្ញាចុងក្រោយដែលអាចបញ្ជាក់ថាអ្នកកំពុងឈ្នះចិត្តនាងហើយនោះគឺ “ការយល់ព្រមតាមការណាត់”។ ប្រសិនបើនាងយល់ព្រមចេញទៅក្រៅជាមួយអ្នកភ្លាមៗដោយមិនស្ទាក់ស្ទើរ នោះគឺជាសញ្ញាដែលបង្ហាញថា នាងត្រៀមខ្លួនរួចជាស្រេចក្នុងការបើកបេះដូងទទួលយកអ្នក៕