កុំចាំដល់ហួសពេល ! រោគសញ្ញាខ្លះៗនៃជំងឺលើសឈាមដែលអ្នកត្រូវប្រុងប្រយ័ត្ន

ជំងឺលើសឈាម (Hypertension) ត្រូវបានគេប្រសិទ្ធនាមថាជា ឃាតករលាក់មុខ ព្រោះជាទូទៅវាមិនសូវបង្ហាញរោគសញ្ញាឱ្យយើងដឹងភ្លាមៗនោះទេ រហូតដល់វាឈានដល់ដំណាក់កាលធ្ងន់ធ្ងរ ។

ទោះជាយ៉ាងណាក៏ដោយ នៅពេលដែលសម្ពាធឈាមឡើងខ្ពស់ខ្លាំង អ្នកជំងឺអាចស្តែងចេញនូវរោគសញ្ញាមួយចំនួនដូចខាងក្រោម ៖

១. រោគសញ្ញាទូទៅដែលឧស្សាហ៍ជួប

–ឈឺក្បាលខ្លាំង ៖ ជាពិសេសឈឺនៅម្ដុំខាងក្រោយកញ្ចឹងក ឬឈឺខ្ទប់ៗនៅសងខាងក្បាល។

–វិលមុខ ៖ មានអារម្មណ៍ថាវិលវង់ ឬស្រាលក្បាល។

–ស្រវាំងភ្នែក៖ មើលអ្វីមិនសូវច្បាស់ ឬឃើញព្រិលៗ។

–ណែនទ្រូង ឬថប់ដង្ហើម៖ មានអារម្មណ៍ថាពិបាកដកដង្ហើម ឬដកដង្ហើមមិនដល់គ្នា។

–អស់កម្លាំងខ្លាំង ៖ មានអារម្មណ៍ថាខ្សោយ និងងងុយដេកខុសធម្មតា។

២. រោគសញ្ញាផ្សេងទៀត (ករណីសម្ពាធឈាមឡើងខ្ពស់ខ្លាំង)

–បេះដូងលោតញាប់៖ មានអារម្មណ៍ថាបេះដូងលោតឌុកដាក់ៗខុសធម្មតា។

–ហូរឈាមច្រមុះ៖ កើតឡើងដោយសារសរសៃឈាមតូចៗក្នុងច្រមុះរងសម្ពាធខ្លាំងពេក។

–ឮសូរក្នុងត្រចៀក៖ មានសម្លេងដូចសត្វមូស ឬសម្លេងវីៗនៅក្នុងត្រចៀក។

–ចង្អោរ ឬក្អួត៖ ករណីខ្លះអាចមានអារម្មណ៍ចង់ក្អួតរួមជាមួយការឈឺក្បាល។

ចំណុចសំខាន់ដែលត្រូវចងចាំ៖ មនុស្សភាគច្រើនដែលលើសឈាម “មិនមានរោគសញ្ញាអ្វីទាំងអស់”។ មធ្យោបាយតែមួយគត់ដើម្បីដឹងថាអ្នកមានជំងឺលើសឈាមឬអត់ គឺការ “វាស់សម្ពាធឈាម” ឱ្យបានទៀងទាត់។