យោងតាមការផ្សាយរបស់សារព័ត៌មានបរទេស ជំងឺទឹកនោមផ្អែមជារឿយៗត្រូវបានគេហៅថា “ឃាតករស្ងាត់ស្ងៀម” ព្រោះវាតែងតែវិវត្តដោយគ្មានរោគសញ្ញាច្បាស់លាស់ លុះត្រាតែមានការខូចខាតធ្ងន់ធ្ងរកើតឡើងទើបមនុស្សភាគច្រើនចាប់អារម្មណ៍។ ទោះជាយ៉ាងណា រាងកាយរបស់យើងតែងតែផ្ញើសញ្ញាព្រមានជាមុនតាមរយៈសរីរាង្គផ្សេងៗ ជាពិសេសគឺ “ដៃ” ដែលប្រៀបដូចជាផែនទីបង្ហាញផ្លូវនៃសុខភាពខាងក្នុង។
សញ្ញាដំបូងដែលមិនគួរមើលរំលងគឺ អាការស្ពឹកម្រាមដៃដោយមិនដឹងមូលហេតុ។ កម្រិតជាតិស្ករក្នុងឈាមខ្ពស់ជាប់លាប់អាចបំផ្លាញសរសៃឈាម និងសរសៃប្រសាទតូចៗនៅក្នុងដៃ ធ្វើឱ្យលំហូរអុកស៊ីសែនថយចុះ រហូតបណ្តាលឱ្យបាត់បង់អារម្មណ៍បណ្តោះអាសន្ន។ ជាមួយគ្នានេះ ស្បែកនៅខ្នងដៃអាចប្រែជាស្ងួត និងរមាស់ខុសធម្មតា ដោយសារជាតិស្ករខ្ពស់រំខានដល់ក្រពេញញើស និងធ្វើឱ្យប្រព័ន្ធភាពស៊ាំស្បែកចុះខ្សោយ ងាយនឹងឆ្លងមេរោគផ្សិត ឬបាក់តេរី។ សញ្ញាដ៏សំខាន់មួយទៀតគឺ “របួសក្រជាសះស្បើយ” ប្រសិនបើរបួសតូចតាចនៅលើដៃមិនបិទជិតក្នុងរយៈពេល ២ សប្តាហ៍ វាគឺជាសញ្ញាថាចរន្តឈាម និងមុខងារប្លាកែតរបស់អ្នកកំពុងរងការរំខានដោយសារជាតិស្ករ។
ក្រៅពីស្បែក ក្រចកក៏អាចប្រាប់ពីអាថ៌កំបាំងនៃជាតិស្ករក្នុងឈាមបានដែរ។ ការប្រែពណ៌ក្រចកទៅជាលឿង ឬការលេចចេញនូវខ្សែបន្ទាត់ផ្ដេកដែលមានសភាពមិនស្មើគ្នា គឺជាសញ្ញានៃការរំខានដល់ការលូតលាស់កោសិកាក្រចកដោយសារលំហូរឈាមមិនល្អ។ បន្ថែមពីនេះ ការលេចចេញនូវដុំពកតូចៗរាងជារង្វង់ ឬការហើមនៅខ្នងដៃក៏អាចបញ្ជាក់ពីភាពមិនប្រក្រតីនៃការរំលាយជាតិស្ករក្នុងរាងកាយផងដែរ។
ប្រសិនបើអ្នកសង្កេតឃើញសញ្ញាទាំងនេះ រួមជាមួយអាការស្រេកទឹកខ្លាំង នោមញឹកញាប់ ឬភ្នែកព្រិលៗ អ្នកគួរតែប្រញាប់ទៅពិនិត្យកម្រិតជាតិស្ករក្នុងឈាមជាមួយគ្រូពេទ្យជំនាញជាបន្ទាន់ ដើម្បីបង្ការផលវិបាកធ្ងន់ធ្ងរដល់សុខភាព៕