យោងតាមការផ្សាយរបស់សារព័ត៌មានបរទេស ទំនុកចិត្តលើខ្លួនឯងគឺជាជារឿងសំខាន់បំផុតសម្រាប់ស៊ីវិល័យ ប៉ុន្តែបញ្ហាក្លិនមិនល្អនៅតំបន់ឯកជន អាចក្លាយជាកង្វល់ដែលរំខានដល់ផ្លូវចិត្ត និងទំនាក់ទំនង។ មនុស្សជាច្រើនប្រហែលជាមិនដឹងទេថា របបអាហារដែលយើងទទួលទានប្រចាំថ្ងៃ មានឥទ្ធិពលផ្ទាល់ទៅលើក្លិនខ្លួន និងតុល្យភាពនៅតំបន់សម្ងាត់។
ជាដំបូង អាហារផ្អាប់ និងគ្រឿងសមុទ្រមួយចំនួន គឺជាប្រភពចម្បងដែលបង្កឱ្យមានក្លិនខ្លាំង។ ម្ហូបដែលពេញនិយមដូចជា ត្រីប្រហុក ក្តាមប្រៃ ឬបន្លែត្រាំផ្សេងៗ សម្បូរទៅដោយជាតិសូដ្យូម និងសារធាតុគីមីដែលរាងកាយបញ្ចេញមកតាមរយៈញើស និងទឹករំអិល ដែលអាចធ្វើឱ្យតំបន់នោះធុំក្លិនឆ្អាត ឬក្លិនផ្អាប់ខ្លាំង។ ទន្ទឹមនឹងនេះ បន្លែ និងគ្រឿងទេសដែលមានក្លិនឆ្អេះដូចជា ខ្ទឹមស ខ្ទឹមបារាំង ឬស្លឹកស្តៅ ក៏មានផ្ទុកជាតិស្ពាន់ធ័រខ្ពស់ ដែលរាងកាយបញ្ចេញតាមរន្ធញើស និងតំបន់ប្រដាប់ភេទ បង្កឱ្យមានក្លិនស្អុយមិនល្អ។
លើសពីនេះ បង្អែម និងភេសជ្ជៈមានជាតិស្ករ ក៏ជាសត្រូវដែលមិនគួររំលងដែរ។ ជាតិស្ករគឺជាអាហារដែលផ្សិត ចូលចិត្តបំផុត ដែលវាអាចបង្កឱ្យមានការឆ្លងមេរោគផ្សិត នាំឱ្យរមាស់ និងធុំក្លិនផ្អាប់ដូចមេដំបែ។ ចំណែកឯគ្រឿងស្រវឹងវិញ វារំខានដល់តុល្យភាពបាក់តេរីល្អនៅក្នុងទ្វារមាស និងធ្វើឱ្យរាងកាយខ្សោះជាតិទឹក ដែលបង្កើនហានិភ័យនៃការឆ្លងមេរោគ និងធ្វើឱ្យក្លិនកាន់តែអាក្រក់ទៅៗ។
ដើម្បីរក្សាសុខភាព និងទំនុកចិត្ត ស្ត្រីគ្រប់រូបគួរងាកមកផឹកទឹកឱ្យបានច្រើន និងជ្រើសរើសអាហារដែលមានតុល្យភាព។ ប្រសិនបើការផ្លាស់ប្តូររបបអាហារនៅតែមិនអាចដោះស្រាយបញ្ហាក្លិនបាន អ្នកគួរតែពិគ្រោះជាមួយគ្រូពេទ្យឯកទេសរោគស្ត្រី ដើម្បីស្វែងរកមូលហេតុពិតប្រាកដ៕