យោងតាមការផ្សាយរបស់សារព័ត៌មានបរទេស បានបង្ហាញថា នៅពេលអាកាសធាតុចុះត្រជាក់ ការងូតទឹកមិនត្រឹមត្រូវអាចបង្កគ្រោះថ្នាក់ដល់ជីវិត ជាពិសេសចំពោះមនុស្សចាស់ និងអ្នកមានជំងឺបេះដូង។ភាពត្រជាក់ធ្វើឱ្យសរសៃឈាមរួមតូចយ៉ាងលឿន ដែលនាំឱ្យសម្ពាធឈាមឡើងខ្ពស់ភ្លាមៗ និងបង្ខំឱ្យបេះដូងធ្វើការខ្លាំងលើសកម្លាំង។
ដើម្បីងូតទឹកឱ្យមានសុវត្ថិភាព អ្នកជំនាញណែនាំឱ្យអនុវត្តតាមគោលការណ៍ “បន្តិចម្ដងៗ” ដើម្បីឱ្យរាងកាយមានពេលសម្របខ្លួន។
៥ គន្លឹះសំខាន់សម្រាប់ការងូតទឹកដោយសុវត្ថិភាព៖
១. កម្ដៅបន្ទប់ទឹក និងរាងកាយ៖ បើកទឹកក្ដៅចោលបន្តិចឱ្យមានចំហាយក្ដៅក្នុងបន្ទប់ទឹក ឬធ្វើចលនាដៃជើង ៣-៥ នាទី មុនពេលងូត។
២. សីតុណ្ហភាពទឹកសមស្រប៖ ប្រើទឹកក្ដៅឧណ្ហៗកម្រិត ៣៧-៤០ អង្សាសេ (កុំប្រើទឹកក្ដៅខ្លាំងពេក) និងជៀសវាងការងូតទឹកក្ដៅឆ្លាស់ត្រជាក់។
៣. ងូតពីចុងជើងឡើងលើ៖ ចាប់ផ្ដើមលាងដៃ ជើង និងអវយវៈមុនគេ រួចទើបឡើងមកដងខ្លួន។ ហាម ចាក់ទឹកលើក្បាល ឬទ្រូងភ្លាមៗ។
៤. កុំងូតយូរពេក៖ គួរងូតត្រឹមតែ ១០-១៥ នាទី បានហើយ ដើម្បីការពារកុំឱ្យវិលមុខ ឬដួលសន្លប់។
៥. ជូតខ្លួនឱ្យស្ងួតភ្លាមៗ៖ ក្រោយងូតទឹក រួសរាន់ជូតខ្លួន និងស្លៀកពាក់ខោអាវក្រាស់ៗ ដើម្បីរក្សាកម្ដៅរាងកាយ៕